الاسم: كامل النصيرات 
...
كيف تْجيبْ مصاري بسرعة ..؟؟
ادخل غرفة نومك بسرعة ..توجهْ إلى المراية الموجودة فيها ..وإذا فشْ عند غرفة نوم ؛ روح على أي إشيْ ترى فيه شكلك الغلط ..اشلح قميصك ..صفِّرْ ..دَنْدِنْ ..أعطيها موّال ..أو هجيني ..!! كمان وإنت واقف قُدّام المراية ..اشلح بنطلونك ..شوي شوي ..على أقل من مهلك ..خلي شلح البنطلون يوخذ معاك خمس دقايق ..ولا تنسى تصفِّرْ ..ودندن ..وأعطيها هل رأى الحبُّ سكارى مثلنا ..وإذا زمن أم كلثوم ولّى ومش عاجبك..أعطيها أطبطب ودلع ..أو بوس الواوا ..لازم وجهك يكون مليان فرح وسرور ..ولازم إللي يشوفك يقول عنّك ولا عمرك شايف هم ..ولا تنسى إنك واقف قُدّام المراية ..يعني فيه حدا جوّاها شايفك ..!!
خلّك بالفانيلا والشورت ..أوعى تشلحهم ..ضروري تظل فيهم ..!! أذا فيه عندك فرشة ؛ حاول تتشقلب عليها شقلبتين ..هيك بسرعة ..دليل التفاؤل والسعادة ..ومش غلط تمعطلك أغنية أو موّال ..يعني كل ما تحس إنو فيه عندك نفس إمعط إللي بدّك إيّاه ..حتى لو أغنية أطفال ..!! تشقلبت يا حبيبي ..؟؟ ممتاز ..!! إذا حاب توخذ دُشْ خذ ..وإذا بدّك توفّر الميّة ..أو فش ميّة من الأصل بلاش من الدش ..أو أقولك خذ دُشْ هوائي ..يعني اتخيّلْ إنك توخذ دُشْ ..وأعطيها أُغنية ( بلدنا على الترعة بتغسل شعرها ) لعبد الحليم ..!!
وين رُحت بالقميص والبنطلون ..؟؟ أوعى تكون ضيعتهم ..حُطهم في كيس أبيض شفّاف ..واطلع من غرفتك ..إلى الشارع وإنت بالشورت و الفانيلا ..والكيس الأبيض بإيدكْ تلولح بيه ..ومش غلط إنك تشقّ الزحمة وإنت تغنّي : إحنا جينا بعزومة مش حيّاالله ..!!وظلك صفّرْ و وزّع ابتسامات لحد ما تصل لعند الزلمة إللي في الدكانة إللي بيستنّى فيك ..سلّمْ عليه وإنت كلّكْ عزّة وكرامة ..أعطه الكيس الأبيض وكأنك تعطيه جائزة ..يعني بفخر ..وخذ الثلاث ليرات من إيدو ..لا تستحي ..خذهن ..وصفّرْ ..وتابع مسيرك بالزحمة بالشورت والفانيلا..وأنت تُغنّي نطنطة : والله وإحلويتي يا دُنيا وتغيرتي كده بثانية..!!
شايف كيف سهل تجيب مصاري ..وكل ما تضايق يا حبيبي .. بيع كمان إللي ظل..ولا تخلّي عندك ولا قطعة ..لحد ربّك ما يفرجها علينا وعليك ..!!
...
abo_baghdad@yahoo.com
كتبها كامل النصيرات في 09:28 صباحاً ::
13 تعليق
في12,حزيران,2006 - 09:58 صباحاً, جـــــــــــــــــــــواد كتبها ...
الله يفضح حريشك كامل.........جريت جري متوقع اعرف كيف امن مصاري وانا الطفراااااااااان....وبالاخير وانا بتمعن بمقالتك اطلعت بالهوا.........http://www.maktoobblog.com/jaouad_maroc
في12,حزيران,2006 - 11:39 صباحاً, محمد اسكندراني كتبها ...
ههههههههههههه والله يا كامل على النهب المنظم الي بيحصل في البلد ليك حق , مضلش الا كدة
في12,حزيران,2006 - 12:02 مساءً, مجهول كتبها ...
الأستاذ الفاضل : كامل صورة مضحكة ... ولكن عندما أعدت قراءتها .. وجدته مبكية وكم من مضحكات مبكيات مع تقديرى واحترامى أخوك محمد الجرايحى http://mmm1962.jeeran.com/
في12,حزيران,2006 - 12:35 مساءً, لداد بن غبشة كتبها ...
ليس من الائق ابدا ان نتلفظ بعبارات لا تصدر بالاصل الا عن من يعيشون في قاع المجتمعات . قد لا يعجبنا مقالة لاحدهم , ونطر للنقده لكن ليس من خلال هذه العبارات النابية . انا شخصيا لم اتفاعل مع هذا المقال كما هو في غيره من مقالات كامل التي ارى ان كثيرا منها يستحق التوقف عنده . لذلك ادعو المجهول ان يعيد النظر في معجمه اللغوي لينال رايه احترام القراء الذي اخالهم على مستوى لا باس به من المعرفة والثقافة .
في12,حزيران,2006 - 02:30 مساءً, مشوار كتبها ...
ما راح نوصل لبيع تيابنا لانه هاظ الى بدهم يحصل يعني صرنا ما نستحي من الله ولا من خلقه و الى ما يستحي بسوي ما يشتهي و ما بهموش حدى يعني بيطلع عن دينو و عن القانون.. يعني بيسمح للي بالي بالك يعملو فيه الي بدهم ياه..... بهيك طريقه ما راح تجيب مصاري هيك راح تجيب مصايب و بلاوي على راصك...
في12,حزيران,2006 - 03:00 مساءً, سمر كتبها ...
وين مقالك عن ناصر جودة والزرقاوي ؟؟؟!!! خليتني آجي على النت عشانه ... وللأسف ما لقيت إشي
في12,حزيران,2006 - 04:36 مساءً, كريمة السعيد كتبها ...
مقال جميل ومعبر عن اللي صاير مش اللي بدو يصير ما سمعتوا عن المصري اللي باع اولادة قرأنه بالجرايد هيك شي مش من عندن . الى سمر معقول ما شفتي مقال ناصر جودة والزرقاوي باين عندك
في12,حزيران,2006 - 07:33 مساءً, مجهول كتبها ...
حلاوتك ياباشا ضحكت بجد والله بس زي ما حدش لسه قال هم يضحك ويبكي تلميذك واحد تاني اللى قريب قوى ح تتبرى مني قلي رأيك في دي http://www.maktoobblog.com/2faris?post
في14,حزيران,2006 - 05:22 صباحاً, Mais S كتبها ...
ان شاء الله الله بفرجها على الجميع www.maktoobblog.com/maissabri
في14,حزيران,2006 - 11:37 مساءً, Mohammad Al-masri كتبها ...
عفية عليك ،، شديتني للآخر مش مشان مصاري، بس كنت مستني المقلب، بتخيل لازم كل واحد بحاول يعمل هالعملة يهيجن فقط لا غير مشان ما تروح منه الحماسة ويجوبن قبل ما يوصل على الذبح تحياتي محمد المصري www.maktoobblog.com/goldengun
في15,حزيران,2006 - 12:15 مساءً, nasrbadwan كتبها ...
والله يا حبيبي صار في مثل صاحب التعليق الأول , كنت أفكر في كيف تربح مليونا , أو تصبح مليونيرا , واذا الخازوق بدك تبيعني اللي فوقي والي تحتي , ما أنا من قبلك عاملها وداير بالشرط بدون فانيللا, لا تخلليني أحلف كذب , ومن ناحية المووايل والأغاني ما خليت موال يعتب , لا زريف الطول ولا جفرا , وحتى لهجيني بدرب عليه , وإذا موش مصدق , ولا غيرك موش مصدق , أدخل على موقع مجلة أقلام الإلكترونيه , بتشوف محسوبك مديك , ونافش ريشه عليهم , وبالمناسبه عندي مشروع قصيدة اسمها ملحمة الفول , لاحظ مشروع لسه , أحسن ما تقول ابعثها , ويسود وجهي معاك , بس المطلع جاهز , وإذا في حد حابب يشتري حقوق الملكية الأدبيه والفكرية , لأنوا المسأله موش صف حكي بس , أنا مستعد أتنازل ( شايف كيف الوصفات اللي ما بتخر المية ) هيك بتجيب الفلوس , موش جاي تقللي اشلح , إحنا موش منهم يا عم. والآن خذ مطلع الملحمة _ آسف إذا جبت طاري اللحمة في داخل الملحمه, بعرف صعب على - إلآَّ من -يوصل الها. لا تفطرن إذا تعشيت فولا / فالفول عدته ثلاث * واشرب من الشاي برميلا / ولا تقرب البيبسي ففيها خلاف* على ذمة البعض تيري عظاما/ وتهري الكبد مثل السلاف* ولا تنس حمدالله تعالى/ ففي الأرض أيام عجاف* جلنا ينهار جوعا / والبعض قد مل الخراف* والجل يلتحف السما / والبعض أضجره اللحاف* إذا ما أطل قيل بدر / بورود في خدود لطاف* مستبشر مثل صبح / ومضيء مثل من صلى وطاف* ( الله يقبل طاعته) سيدي , أكتفي بهذا القدر , لأني هون بنشرت وبستنا الوحي , الله يفتح علينا مثل ما فتح عليك. لا تنسى إذا حصلت مشتري للقصيده خبرني , لأنو كمان عندي دكتور صاحب موهوب يعني , عنده كمان ديوان للبيع , يعني لا تخاف يخلص الستوك. بس خلي العجله _ بفتح العين - تدور , لزم التنويه هنا لأنو الناس عيونها مبحلقه , ما بتصدق تسمع سيلة عِجل ولا خروف , عشان تنقض مثل الجت , ولا مثل اللي بتعرفوا , وموش عنه في الغور, يعني اللي بحرمك تلع اللقمة من الكيس. ( إحزر شو هو وخذ بوسه ع الهوا ). تحياتي نصر بد وان
في15,حزيران,2006 - 12:57 مساءً, nasrbadwan كتبها ...
كان في الي تعليق وطار , إذا شفته خبرني , وإذا ما شفته فكرك شو اللي صار , لأني أخذت نسخه عنه , وبعد شوي اختفى عن الموقع . أفيدونا
في21,حزيران,2006 - 03:47 مساءً, مجهول كتبها ...
بتعرف شو مرات بقول كيف الواحد بيطلع معو الضحك مع انو يا سلالالالالالالالالام كتير صافي قلبو بسي لازم يطلع لو كانت حالتنا بعز المعمعة عرفتها للمعمعة هههه اكيد انت اكتر واحد عارفها لانو عم تكتب عنها بس بطريقتك و دمتم LILY BALKEES