حاجات كتير

عارف يا واد يا محمد
نا لو كان معايا عصايا سحريه
كنت حخلى صدقتنا احلى من الحاله اللى احنا فيها دلوقت
وعارف لو طلعلى العفريت من المصباح وقلى اطلب
حطلب طلبين بس
والتالت حدهولك عارف ليه عشان انت حبيبى
ولو العفريت طلع قليل الادب ومارضاش
حطلب انا بالنيابه عنك
مش احنا اخوات وصحاب من زمان
انا عارف لو طلعلك العفريت حتطلب ايه
وعارف كمان يا باشمهندس
انا سعات بفكر فى افكار مجنونه بس ما برضاش اقولهالك عشان متزعلش
اصلى مقدرش على زعلك
وسعات برده حجات مابرضاش اعملها عشان خاطرك وانت عارف انت ليك خاطر عندى
صحيح انت سعات بتجننى
وسعات تختفى بالايام

لكن بحبك
انا عارف انى بقولهالك كتير
بس كل مره بقولهالك بحس ان حبك جوه قلبى بيكبر
كفايه كده
عليك النهارده
بس كان ليا عندك طلب
امانه عليك يا شيخ
وحلفتك بالله
تكتبلى ورقه اى ورقه فيها اى كلام
حتى لو حكم صينيه او معلومات رياضيه او حتى مسائل حسابيه
عشان لما توحشنى وانت عارف انك حتوحشنى
اطلع الورقه وابص فيها
واسرح معاها يمكن السرحان يخفف عنى بعادك
واياك تقولى معرفش
واللى بنا اكبر من كل الكلام
والحاجات اللى انتا بتضحك عليا بيها كل مره
عارف انا سعات مبقدرش افتكر كل اللى مر علينا

لان اللى بنا اكبر من انى افتكره كله

مش حكلمك عن ايام الدراسه من ايام ابتدائى واللعب قبل طابور الصباح الممل

مش حكلمك عن الاذاعه المدرسيه اللى انت كنت واخدها احتكار فى اعدادى

ولا حكلمك عن الكشرى ولا جنون عمر وعمار

ولا حكلمك عن اول درس فى المسجد نحضره مع بعض فى الجامعه

ولا عن رمضان كل سنه ومحاولتنا اننا نعتكف مع بعض وفى الاخر مينفعش

ولا عن خطبه الجمعه اللى نفسى اسمعا منك ومش قادر عشان درس الجمعه بتاعى

ولا عن شغلنا مع بعض فى انتخابات 2005 ولحد الان

ولا عن احساسى يوم ما اعتقلت فى القاهره

مش حكلمك عن حجات كتير جدا اكتر من انى افتكرها

وحطلب منك طلب لانى عارف انك مش حتنفذ الطلب الاول

ادعيلى يا محمد وانت بتصلى الفجر

ادعيلى ربنا يرزقنى اتباع الحق

وانى والله احبك فيه