I B R A H I M

كتب المدعو ماشي صح في تدوينه المُخَلصون المُخْلصون

وبعد قرائتي لما عاناه تذكرت معاناتي مع (البلديه,الدفاع المدني,مكتب العمل,مكتب الإستخدام) فالسابق ذكرهم هم عباره عن مجموعه من الإدارات اللي همها الوحيد الإستهبال على المواطن, بعد أن كنت أظن أنهم في خدمة المواطن.

فالناظر إلى طريقة تعاملهم يوقن تماماً بأنهم يستهبلون, وأن نظامهم أهبل.

وبعد قراءة التدوينه سوف تقتنع (بهبلهم)

البلدية

في البدايه قلنا نبي نفتح مشروع ينفعنا في الدخل … وبعد التفكير إستقر الإختيار على ” مغسله ملابس ” .. وتم إختيار إسم ” فقاقيع ” عنوانً لها.

بدأت مع البلديه وفي أول يوم إستأذنت من الدوام الصباح ومريت عليهم وأول إجراء قالي

إنت متزوج ولا أعزب؟ قلت له متزوج, قالي طيب نبي برنت من الأحوال المدنيه !! قلت له طيب لو أعزب ؟ قالي برضو برنت من الأحوال المدنيه. قلت طيب من باب اللقافه ياسيدي.. البطاقه ماتكفي؟؟ قال لا لازم برنت( وأنا متأكد إنه مايدري ليه يبي البرنت بس هي كذا ) المهم رحت للأحوال المدنيه وقلت له أبي برنت لو سمحت, قالي لأي جهه بتقدمه؟ قلت للبلديه .. قالي طيب وين الطلب؟؟ قلت له أي طلب؟ قالي لازم البلديه تعطيك طلب للبرنت تقدمه لنا … تبسمت وقلت طيب ترى راس ماله برنت يعني ماهو مشكله كبيره … وبعدين وش بسوي فيه … وبعدين البلديه توهم مرسليني لكم وماقالو لي عن الطلب.. قالي هذي مشكلتهم مو مشكلتي … المهم رحت للبلديه وعطاني الطلب مع إنه يدري انه لازم طلب بس زي ماقلت لكم إنهم ( يستهبلون )

خلصت من الأحوال المدنيه ثاني يوم وبعد ماخلصت الأوراق. سألني مديرهم .. المغسله كامله وجاهزه وفيها المتطلبات؟؟

قلت له قولي إنت وش هي المتطلبات وأنا أسويها كلها … عطني ورقة الطلبات !!

قال مافي ورقة طلبات معينه … بس انت ركب اللوحه وحط المعدات .. قلت له بس؟؟ قال إيواه بس.

ثاني يوم جاء المفتش قالي وين أغراض الدفاع المدني ؟؟ قلت له ياخي ريسك ماقالي !! قال ماعليك منه داج ومايعرف شئ

إختيار الإسم

المهم , خلصنا الطلبات ووصلنا لإختيار الإسم علشان نسجله … رحت لرئيس قسم الرخص… وعطيته أوراقي وقالي مرني بكره … بعد مامريته ثاني يوم قالي السكرتير إن مديرهم رفض الإسم … دخلت على المدير وقلت ليه طال عمرك مرفوض الإسم … قالي يعني ماتدري؟ هذا إسم ( باللهجه هذي) قلت له عسى ماشر ولايكون مكتوب عندك غلط … ترى الإسم اللي إخترته أنا ( فقاقيع ) … قال إيه أدري فقاقيع .. هذا إٍسم … لالا شف لك شئ ثاني.. قلت له أول شئ قلي انت وش فيه ذا الاسم؟؟ قال فقاقيع !!! وش معنى اخترت هالاسم … قلت له يا استاذي حنا فاتحين مغسلة والمغسلة عباره عن ماء وصابون … ولما تخلطهم يطلع لك فقاقيع … وبس … قالي عموماً أنا ماني موقع ودها لرئيس البلديه وهو يوقع لك اذا يبي أما أنا لا. المهم وديتها له ووقع مشكوراً.

الإستقدام

شهرين على ماخلصت أوراقهم وانتظرت الموافقه من الرياض … أنا محتاج في الأصل 3 عمال … فعبيت الفورم على أساس 3 عمال … وأنا أعبي الفورم كان جنبي مصري خبره في أمور الإستقدام … قالي ياباشا إنت عاوز كم عامل؟؟ قلت أبي ثلاثه … قالي أكتب في الفورم 6 وحيدوك ثلاثه ..أنا قلت له ليه طيب ؟ قالي هيا كده … قلت له إنت أدرى..
وقالي بما انك مغسله اطلب واحد توصيل وواحد كوي وواحد فرز ملابس وواحد كواي وهكذا … لازم يقتنعون ان عندك شغل كثير… وسويت كلامه ونجحت طريقته وعطونه ثلاثه .. يعني الموضوع إستهبال لا أكثر ولا أقل ويجب على الشخص التعامل مع الأمر بهذي الطريقه..

الفيز

كوني راح أرسل الفيز لعامل في الهند وهو بيجيب ربعه وبيجي … فخذيت الفيز وأرسلتها لصاحبي الهندي … وبعد إنتظار طويل رد الهندي وقال انه عنده مشاكل مع الجوازات وماراح يقدر يجي السعوديه … شكله منحاش من كفيله قبل .
أنا خفت أن الهندي كذاب وبيطلع الفيزا وبيجي السعوديه وأنا مادري… رحت لمكتب إستقدام وسئلته وشلون أتأكد إنه ماجاء. قالي إنت وكلت مكتب من هنا ولا أرسلتها له على طول؟
قلت له لا أنا أرسلتها على طول لأني أعرف الهندي… قال أهااااا لا خلاص أجل لاتخاف ماراح يقدر يطلعها لأن النظام تغير .. الحين لازم توكل مكتب إستقدام و بعدين ترسل الأوراق لمكتب في الهند وخويك يجي عن طريقه .. قلت طيب التوكيل وش فايدته ؟ قال ماله أي فايده غير ان الهندي يجي .. قلت طيب فيه أي خدمه تقدمونها لي؟ ترسلون الأوراق عن طريقكم مثلاً؟ قال لا, مجرد أعطيك التوكيل ومن يوم تطلع من الباب ماعاد لنا دخل.

يعني الموضوع اتفاقيه بين مكتب الإستقدام والمكاتب الخاصه والضحيه المواطن.

وباقي بعض التفاصيل .. لكن الحمد لله وصلو العمال وفتحنا المحل بعد معاناة 7 شهور(يعني أجار الست شهور الألولى راح على الفاضي) وليس مثل ما قال ماشي صح 6 شهور

أحب أن ألخص هذه المعاناه ببعض هذا التساؤلات:-

* ليه يجب عليك توجيه خطاب رسمي لكي تأخذ برنت من الأحوال المدنيه؟
* ليه البلديه تأخذ 300 ريال على كل متر بالنسبه للوحه اللي بتركبها للمحل
(2متر = 600) وعليك الحسبه؟ ويقولون الضرائب حرام.
*ليه أوكل مكتب خاص وياخذ 200 ريال وهو ماراح يقدم لي أي ضمانات على الاستقدام.. الموضوع سرقه بس؟
*ليه أدفع 2000 ريال مقابل إني بجيب شخص على حسابي والدوله لن تتكفل بأي شئ ؟؟
*ليه دبي تخلص أمورك بيوم وهنا 7 شهور؟؟
*مغسله وخذت 7 شهور .. أجل نلوم أصحاب الشركات والمؤسسات إنهم يهاجرون بأموالهم للخارج؟؟

المهم ترانا مسوين خصم 35% ونعطر الثياب ونعطي مناديل معطره ونزيل البقع … ونزيل القشره بعد

وهذا هو اللوقو

اللوحه

اللوقو واللوحه من تصميم المصمم اللي أحرجنا بتعامله ,

الإستاذ علي hayan3li@hotmail.com

ودمتم بود