يعني والله خجلان من وين بدي بلش، بس أكيد أكيد حجب فيس بوك في سوريا ما حدا من مستخدمي الإنترنت في سوريا استغربوا يعني شي متوقع حتى أنا استغربت ليش لهلأ ما حجبوه، يعني موقع ابيبدأ بي دبليو و ابينتهي بدوت كوم و ما يحجب في سوريا فعلا شي غريب بس الحمد لله إنو حجبوه حتى ما انتم مستغربين !

على العموم مافي شي غريب عن مسؤولي حجب المواقع في سوريا إنو يحجبوا موقع متل فيس بوك إذا بزمانهم حجبوا موقع وزارة التعليم العالي لمدة 3 أيام تقريبا و استغربت وقتها إنو طلعلي لما حاولت فوت على موقع الوزارة متل ما ابيطلع عند حجب المواقع عادة ( ما ابيطلع شي بس ابيكتبلك ” تم ” بأسفل المتصفح ) فعادي في المعادي إنو يحجبوا هيك موقع.

عادي لا تحزنوا ولا اتعصبوا ولا على بالكم، تمسحنا و ما عادت فرقت معنا، و بحب فرحكم بخبرية متاكد منها إنو هاد آخر موقع حيحجبوه في سوريا لأنو أساسا ما عاد بقيان مواقع مفتوحة ليحجبوها فانبسطوا، لك انبسطوا ما حدا ادكم.

وانا عندي اقتراح لأصحاب المواقع في سوريا إنهم لما بدهم يعملوا موقع ما يحطوا فيو شي لأن هيك هيك حينحجب فبلا ما يعزبوا حالهم ، تعب على الفاضي.

بعدين بصراحة يا شباب و ايدي على راسكم شو عاد الو طعمة الإنترنت عنا؟ مواقع و محجوبة و سرعة بتجيب السكتة القلبية فلشو محتاجين الإنترنت؟ من شان الإيميلات و البريد؟ اي محلولة منرجع منستخدم الحمام الزاجل على الأقل مضمون و أسرع من الإنترنت عنا !

لك آآآآآآخ شو بدنا نحكي، شر البلية ما يضحك ، اضحكوا اخواتي اضحكوا

إلى اللقاء مع موضوع جديد رح يكون بعنوان طرق الوقاية من السكتة القلبية الناتجة عن استخدام الإنترنت في سوريا، فتابعونا.

تحديث:

مواقع ذات صلة:

حجب FaceBook في سوريا !؟

حجب موقع facebook في سوريا

التشقلبات التي أخبرتني بها كارمن

أودعناكم

Most Commented Posts