الاسم: كامل النصيرات 
مين أبو مين ..؟؟ ومين ابن مين ..؟؟ ومين أخو مين ..؟؟ ومين ومين ومين ..؟؟
***
هذي الحكومة حزورة عن جد .. بل .. مجموعة حزازير مشلبكات مع بعضهن ..فأنت عندما تنظر إلى ( تشكيلة ) هذه الحكومة فإنك تتخربط و يلتعن أبو إللي نفض بقايا عقلك وأنت تحاول أن تفهم الأمر التالي فقط : مين أبو مين ..؟؟ ومين ابن مين ..؟؟ ومين أخو مين ..؟؟ ومين عديل مين ..؟؟ ومين عم مين ..؟؟ ومين ابن عم مين..؟؟ ومين شريك مين ..؟؟ ومين حما مين ..؟؟ ومين ابن اخت مين ..ومين خال مين..؟؟ ومين جاب مين ..؟؟ ومين حط مين ..؟؟ ومين كنّة مين ..؟؟ ومين ومين ومين ومين ومين ..؟؟والعلم عند القيسي ياسين ..لأنو علم الأنساب القديم سيتوقف عند هذه الحكومة ويبدأ يؤسس من جديد لأنساب جديدة هي علم ( أنساب جديدة و حزازير حصيدة ) ..!!
كل الحق على أبوي ..ليش يابا ما كنت وزير ..؟؟ مش عشان الوطن ..ولا عشان الوزارة حقك ..عشاني يابا ..لو كنت وزير من زمان ..كان أنا صرت وزير هسّة ..!! ليش يابا ظليتك في المزرعة إللي عبّتنا ديون ورا ديون ؛ وليش ما نزلت لمجلس النواب وصرت نائب من زمان ..كان أنا هسّة ابن نائب ..مش عشانك ولا عشان الوطن ..عشاني وعشان إخواني ..كان أخذوا منا واحد في التشكيلة الحكومية ..!! ليش يابا تجوزت أمّي ..أمّية ..؟؟ كان تجوزت بنت وزير أو بنت نائب أو بنت رجل أعمال ..مش عشانك ولا عشان الوطن ..عشاني يابا ..كان هسّة أجو يترجوني ويقولولي : نقّي الوزارة إللي تعجبك ..!! ليش يابا ما جوزتني وحدة أبوها أو أخوها أو ابن خالة أمها وزير أو نائب أو عين ..كان أنا هسّة أخذوني بالتشكيلة بهمّة المدام وقرايبها ..!! ليش يابا حرام عليك ..حتى إنك تصير شريك لواحد كبير ما عملتها ..ليش ليش ..؟؟ وما دامك ما عملتها ليش تخلفني وتخلِّف إخواني ..عشان نقعد نحل بحزازير التشكيلة الجديدة للحكومة ..مين ابن مين ومين أخو مين ومين عم مين ...ومين ومين ومين ومين ومين ..؟؟
نداء حار إلى والدي ..أمامك واحد من حلّين وإلا فقدتني للأبد ..إمّا تدورلي على وحدة هيّ ( ثقّالة ) أو أبوها ثقاّل ..مش عشاني ولا عشان الوطن ولا عشان إخواني ..بل ..عشان أحجز لأبني ( إللي عمره شهر ونص ) مقعد وزاري من هسّة ..!! أو تتجوز على أمّي وحدة محرزة وعليها القيمة لا يقل أبوها عن وزير أو نائب ( ثقّال ) ..!!!
يا ناس يا بشر ..هوّ عن جد : مين أبو مين ..؟؟ ومين ابن مين ..؟؟ ومين أخو مين ..؟؟ ومين عديل مين ..؟؟ ومين عم مين ..ومين ابن عم مين..؟؟ ومين شريك مين ..؟؟ ومين حما مين ..؟؟ ومين ابن اخت مين ..ومين خال مين..؟؟ ومين جاب مين ..؟؟ ومين حط مين ..؟؟ ومين كنّة مين ..؟؟ ومين ومين ومين ومين ..؟؟!!
كتبها كامل النصيرات في 04:17 صباحاً ::
لا يوجد تعليق