مغامرات طبيب فى الأرياف 4

الله أكبر … الحمد لله

إنتصرت و عاد حقي … تقاضيت حافزي الضائع بعد شهرين من المرار
لا أستطيع وصف فرحتي، أود أن أفقع زغروده “لولولولولولولولولي”
شهرين و أنا أحايل الموظف الفلاني و أدلع الموظف العلاني و أشتم و أقل أدبي على الموظف الترتاني و أشتكي فى المديرية و الإدارة و حتى طوب الأرض
بقيت عامل زي النساوين..كل ما شوف حد أقوله و أحكيله همي … دول ستميت جنيه يا جدعان مش أى كلام
و آدي صورة الشيك اللى نشفوا ريقي عليه

شيك مالي

معلش أنا عارف أنى بكتب النهاردة بالعامية المصرية بس بصراحة، اللغة الفصحى مش هتسيع كلامي و فرحتي.
أنا حاسس أن مصر لسه بخير .. و إن الحق مش بيضيع فيها، آه أمال إيه…

إيه يعني لما تطفح الكوته لحد ما يوصلك حقك
المهم إن حقك مش بيضيع فيها
إيه يعني لما ترشيلك إتنين تلاته عشان ترجع حقك
المهم إن حقك مش بيضيع فيها
إيه يعني لما تبقى زي الحرباية بميت لون عشان تعرف تعامل الموظفين فيها عشان ترجع حقك
المهم إن حقك مش بيضيع فيها
إيه يعني لما توسط ناس عشان تكلم ناس عشان توصي ناس تاني تكلم البهوات عشان يرجعولك حقك
المهم إن حقك مش بيضيع فيها
إيه يعني لما تضرب أسفين فى غيرك عشان ترجع حقك
المهم إن حقك مش بيضيع فيها

و زقيت وحدة الحتاحته كلها الساقع أول إمبارح بمناسبة حصولى على الشيك و العيال إتلمت و ضربنا نار إحتفالاً بهذه المناسبة القومية و ليكون أول أمس شهاده للتاريخ حول إسترجاع الحق المهضوم لأصحابه

و ما نجلكوش فى حاجة وحشة و السلام عليكم

« رفع الدعم



18 تعليق to “مغامرات طبيب فى الأرياف 4”

  1. بص انت قدم على الهجرة لكندا واخلص! وانا بقولك كندا لان نظام الهجرة فيها هو الافضل والأسهل.

    بس الحقيقة انا ما كنتش اعرف ان دلوقتي الناس في مصر بقت بتقبض بشيكات، يعني مصر بقت زي امريكا يعني اهه ايه الفرق بقى؟ هم المصريين بس اللي بيحبوا يشتكوا يا راجل.

  2. طيب مفيش حاجة علينا يا سيدي

    فيييييييييييييين الحلاوة

    مبرووووووووووووووووووووووووووك عقبال المرات الجاية بس من غير عناء طبعا

  3. مش هتنازل عن الحاجه الساقعة بتاعتي :D

  4. نسيت حاجه
    الـ 15 قرش الي في الشيك دول هاخدهم فوق الحاجه الساقعة كمان

  5. فى الحقيقة يا محمد أنا نويت أهاجر لكوكب زحل.. بس مش عارف الويب سايت بتاعهم
    —
    أبومروان و هبه .. الساقع بتاعكم فى الفرن لحد ما أصرف الشيك :D
    —
    هبة كله إلا ال 15 قرش دول، لا يمكن تاخديهم منى أبداً

  6. الويب سايت بتاعهم هو بتاع كندا صدقني. بص ادخل واعمل الـ self assessment الاتوماتيك هيقلك ايه فرصتك في الهجرة. ومجال الطب عموما والأسنان هيهأ لك وضع ممتاز ان شاء الله. وهو الموضوع هموما بياخد حوالي سنة ونص او سنتين لحد ما تلاقي نفسك هناك، ابتدي دلوقتي وخد وقتك. لا بأس أن تهاجر يا صديقي حتى يقضي الله أمراً.

  7. المشكلة بس ان مصر هتخسر كمان واحد بيفهم!

  8. 584,15 جنيه مش 600 . ركز شوية :D
    و نزل طقم شاي مش ساقع عشان الجو سقيع عندنا في القاهرة :)
    في انتظار الطقم السخن يا دكتور هيماز..

  9. هيييييه هييييييييه

    وأخييييرا طلع الشيك !!!

    مبرووووووووووووك

  10. الف مبروووووك يا دكتور

    اخيرا …

    عقبال باقي المظلومين …

    بس دوول مش 600 بالظبط ؟؟ و لا ايه ؟؟

    بانتظار الساقع … يا دكتور

  11. روح يا شيخ إلهي يكرمك :)

    فكرتني بشيك مكافأة التفوق في اولى كلية اللي كان بـ 42 جنيه بحالهم :))

  12. شكرا شكرا يا جماعة.. و الله لو أعرف موقع يبعت مشاريب أونلاين كنت بعت لكل واحد طلبه..شاي ،سحلب، حلبه… و كل اللى أنتى عايزينه
    و انا عارف انهم مش 600 بالظبط بس لازم الرقم -حين تتعامل مع الحكومة- يضّرب فى مُعامل الهتش

  13. مايضيع حق وراه حربايه يابو خليل …

    أنا أكبر حربايه في العالم العربي … لأني كل الأمور تعتبر تعطفاً ورحمه من الموظف وليست حقاً لك :|

    وأنا عاوز أزوزه أصلي ما بشربش الشاي

    :)

  14. أقول أبو خليل … كان عليها ضريبه بعد ؟؟

  15. الجنيه كم ليرة؟ أو كم دولار؟

    ولا يهمك يا زلمة، احكي مصري، بالعكس اللهجة المصرية زي العسل، مافي أحلى من اللهجات العربية.

    ألف مبروك سيدي، وعقبال المليون جنيه.

    على فكرة، بتذكر إني قريت كتاب اسمو “يوميات نائب في الأرياف” صح؟، إلا أنا مخربط، يمكن كان كوميدي على ما أذكر…

  16. مفتش الاغذية :
    15 January 2008 الساعة 3:46 pm

    وانا بقول هو بطل يسأل علينا ليه
    انت غنيت دي الوقت
    ISLAM

  17. قلبك ابيض انا بقى ياسيدى اشتغلت فى الامتياز سنة 2004 بمستشفى دمنهور التعليمى لمدة 8 شهور دون ان اتقاضى جنيه واحد انا وباقى الزملاء (حوالى120طبيب)وخدنا الحماس وتجرئنا وطالبنا بحقنا فما كان من مدير المستشفى د/محمد عبدالواحد (لا رحمه الله)ان طردنا فى الشارع وامر كاتب الدفتر بمنعنا من الامضاء وللحديث بقيه

  18. محدش عرفك ان اطباء الاسنان اللي انا منهم بيتعاملو درجة تانية
    وتلاقيهم متضايقين انك بتتكلم على لسانهم
    ياريت نتكلم مع بعض
    واشركني في جمعيتك يا اخي
    0105684344

أكتب تعليقك

أول عدسة »