Tuesday, March 04, 2008

سهـــرة كل يــوم السعيـــدة

ننصح بتناول هذه الكبشة من الحبوب قبل القراءة وخاصة إذا كانت سهراتكم مثل سهراتى السعيدة

أوأة بدأت وللا لسه؟
على وشك..مالك مهتم بيها النهاردة؟
عايز أشوف هتعدد على مين ..لابسة أسود برضه؟
طببببعاً.. هو دة اللون المناسب للمناخ العام..بس النهاردة حاطة وردة موف غامق على الجاكت .. أكيد فيه خبر حلو..يعنى مذيعة برنامج إخبارى يومى زى منى الشاذلى كل يوم بتنقل تقارير عن حال البلد..وحط خطين تحت حاااال البلد..عايزها تلبس إيه..زى رولا على تليفزيون الحياة؟
هو انتى لحقتى نزلتى تليفزيون الحياة؟
أيون..هى دى العولمة والمواكبة
بلاش أيون دى ..بتنرفزنى..اسمها أيوة
فاصل..ونواصل
تراباتتى تراباتتو
اعتصام تجار السمك فى السويس..الحق
التجار معتصمون لأنهم نقلوا السوق برة المدينة..وسابوا سوق واحد جوة المدينة..وهم بينشّوا حاليا على الصحراوى لأن السكان بيشتروا من السوق القريب
محام مستحمى حديثاً يؤكد أن التجار وكلوه فقام بإبلاغ الهيومن رايتس ووتش عن الموضوع
فاصل ونواصل
تررارم رم رم رم
ارتفاع أسعار الأسمدة يؤدى إلى بوار الأراضى الزراعية
هو لسه فيه أراضى زراعية
فلاح لابس جلابية وعرقه مرقه يؤكد على أهمية الأسمدة للزراعات
فلاح لابس جلابية وشنبه متهدل يؤكد أن أسعار الأسمدة ارتفعت للضعف
فلاح لابس بنطلون وقميص طالع برة وشعره منكوش يؤكد أن ارتفاع الأسعار عمداً ومع سبق الإصرار لتبوير الأراضى وتشريد أصحاب الملكيات الصغيرة لصالح الكيانات الكبيرة..الإقطاعيون الجدد

كاااااات
فاصل ونواصل
تراباتتى تى تى تى

غيرى القناة وهاتى الاحتفال بتقليد الاوسمة للمنتخب
عايز أنهى قناة فى العشرميت قناة رياضية اللى عندنا
بلابيعو سبورت
حاضر
وقد تأكد لنا من مصدر موثوق منه أنه كانت هناك تعليمات مشددة ومشددة ومشددة على ضرورة وجود الكابتن عصام الحضرى ضمن أعضاء الفريق المتوج لينال الوسام من الطبقة الأولى وذلك لأنه ركن

قلبتى ليه
عايز الولد يشوف إن اللى بيزور ويكت ويفلسع ويهرب ويسيب التزاماته بياخد وسام..هيعمل الواجب ازاى كدة؟

تانى منى الشاذلى؟
أيون

والآن مع البمبة الكبيرة
الأخ العقيد القائد الشقيق يؤكد على إلغاء الحكومة
هى قالت إيه؟
قالت إلغاء الحكومة
والآن مع تقرير من الشارع المصرى عن رأيه فى التجربة الليبية
مواطن لابس سويتر بيؤكد أن دة مش صح
مواطن لابس بدلة بيؤكد أن الأخ العقيد القائد والشقيق عودنا على قرارات زى دى
مواطن لابس قميص تقيل بيؤكد أن الراجل بقاله تسعة وتلاتين سنة عنده حكومة ما عملتش حاجة..يغيرها مش يشيلها
الراجل دة فكرنى بنكتة الكوبرى عارفها؟
هاتى بلابيعو سبورت
استنى بس
سألوا نفس المواطنين اللى فاتوا..ممكن دة يحصل فى مصر
مواطن لابس سويتر بيؤكد أن دة مش ممكن
مواطن لابس بدلة بيؤكد أن دة مستبعد جداً لأن مصر بلد مؤسسات
مواطن لابس قميص تقيل بيراجع نفسه للحظة وبيؤكد..إنه ممكن..ما احنا عندنا حكومة عملت لنا إيه؟
وقد أكد الاخ العقيد القائد والشقيق أن كل واحد سيأخذ خمسة آلاف بتاع من بتاعهم فى الشهر حقه ناشف فى الثروة النفطية ويعمل فيه اللى هو عايزه

إعلان
اتصل على رقم زيرو تسعمية على خط الدعوات الصالحات وبكدة تضمن إن مافيش حسنات هتفوتك

هاااااتى بلابيعو سبورت
حاااااااااضر

Posted by بثينــــــة :: 2:56 PM :: 13 Comments:

Post a Comment

---------------------------------------