|
سلامو عليكم
وصلتني رسالة على الميل من ايميل لا أعرفه
اسمها ::
أغنية جامدة جدا لرد اعتبارنا امام اسرائيل
بصراحة انا ضحكت
و رحت كلمت ناس كتير على الايميل
شوفوا الهنا اللي احنا فيه
اغنية جامدة
عشان كده هترد اعتبارنا
الاغنية وصلتني من تلات ايام
انا فتحتها النهارده ، لاني بصراحة مكنتش فايق اسمع حاجة يعني ، او اتفرج على حاجة .. لأن الاغنية اكتشفت انها كليب
على كل حال ..
و فتحتها عشان احطها في المدونة بصراحة ، و اعلق على عنوانها
انا فتحتها و بدايتها كانت لطيقة
هي مكتوب انها لفرقة راب مصرية ، ايجي راب اسمها ،
فانا فتحت الاغنية ، استنيت لما تحمل كاملة ، و فتحتها
كان نفسي اعرف فيها ايه الاغنية اللي هترد اعتبارنا امام اسرائيل
شيء جميل جدا اننا نرد اعتبارنا بأغنية
على كل حال .. بداية الاغنية كانت كويسة جدا ، لحد لما بدأوا اللي بيغنوا يشتموا
انا مرضيتش اكملها للآخر ، لكن فعلا .. اتأكدت اد ايه احنا ولا حاجة
لما يكون رد اعتبار النس اللي اتقتلوا و بيتقتلوا و شهداءنا من سنة 48 لحد دلوقتي
اغنية بيتشتم فيها الأمريكان و الاسرائيليين
انا معتقدش ابدا ان اللي غنى الاغنية دي مكانش هيشرب كولا وللا يدخن مارلبورو لما يخلص
اقصد يعني .. انه مش هيقاطع ، لأن مفيش واحد هيقول الكلمات دي و يفكر في مقاطعة
انا مرضيتش ابعت رسالة للأخ اللي بعت لي الاغنية
لأنه ده شايف انه بجهده ده بيرد اعتبارنا قدام اسرائيل
كان نفسي فننا يكون موجه أحسن من كده
و كان نفسي فننا يكون هادف اكتر من كده
انا رأيي ان اغنية هادية و كلماتها ( متردش اعتبارنا ) و اللي يغنوها يكونوا محترمين في كلامهم و نقدهم
و انهم يعملوا حاجة عملية مفيدة
يقاطعوا
يتبرعوا
يغنوا بشكل افضل
هيكون دعم للقضية أكتر كتيييير من دعمها بشتايم !!!
---
على فكره .. اغنية الضمير العربي عاجباني جدا ..بس شايف انها اقل من الحلم العربي ، ممكن الجهد المبذول فيها اكتر .. لكن رأيي البسيط يعني .. ان الحلم العربي كانت افضل
اهه جهد مشكور :)
--------
ردا على أغنية بهذا الشكل ..
كتبت تلك الكلمة كمفتاحا للتدوينة .. لكني أفضلها في نهايتها
أتمثل ابراهيم نصر في فيلم شمس الزناتي عندما سأل شخصا من الواحة عن اسمه ، فقال له دعدور ، و كان رد ابراهيم نصر بكل بساطة .. رابنا يشفي
Labels: نوعا ما تهييس |
فعلا شر البلية ما يضحك
وبعدين مش فننا حاليا اللي هيكون راقي وهادف وماالى ذلك
لان ببساطة واقعنا مش كده