Monday, March 17, 2008

الحكومـــة هـــى السبــــب

فى حوار عائلى بهيج سألنى فى ليلة جميلة بادية القمر وبكل رومانسيكية سؤالاً مباشراً قاصداً سبر أغوارى ومعرفة خبيئتى:ـ
احنا بنستعمل كام زجاجة زيت فى الشهر؟
تذكرت للحظة هلعه ونظرة الرعب التى تجسدت فى عينيه عندما دخل المطبخ منذ يومين ووجدنى أصب الزيت صباً وأكبه كباً فى الحلة العميقة ذات الشبكة لقلى كمية من البطاطس الشيبسى للاولاد
تذكرت لحظتها أنه تدارك نفسه وقال بعفوية مصطنعة ياريتك تقلى فى الطاسة الصغنونة الحلوة الجميلة التيفال اللى جبناها جديد..جربى
وقررت أن اطمئنه أننى لست من أولئك السفيهات..فقلت له أننى أستعمل زجاجتين..لترين..واحد ذرة وواحد عباد الشمس
لمحت نظرة عدم التصديق فى عينيه..فأطلت النظر فى عينيه..تتويه وغلوشة يعنى
ـ تعرفى إن عينيكى حلوة..بس احنا معدل استهلاكنا من الرز أد إيه؟
لم يدعنى أرد وأكمل..أنا مش قادر أصدق ..النوعية الكويسة اللى كنا بنجيبها ارتفع سعرها من اتنين جنيه ونصف للكيلو إلى خمسة جنيه فى خلال أربعة شهور..تفتكرى نقلل الكوانتيتى وللا نقلل الكواليتى..ما هو لازم نقلل حاجة..ثم إن أنا وإنت محتاجين نخس
أقوللك احنا نلغى اشتراك النادى بلا نادى بلا بتاع..ونقلل الرز

كان هذا أوان قطرات من البارفان لكى تعمل على إفاقته من هذا الحديث البائس..رشة بريئة جريئة
ـ إيه الريحة الحلوة دى يا حبيبتى..بالمناسبة.. انت عارفة شقلة المنظفات اللى جبتهالك الشهر دة بقت بكام..مش هتصدقى.. أنا بقول تخلى عطيات تستعمل جاز وورق جرايد علشان الإزاز ..وبدل جيف وباف وهف وبريل والكلام دة نعود للفنيك..وأهو مطهر برضه..وبالنسبة للشامبو فأنا باقترح ندور على صابون نابلسى شاهين..دة زيت زيتون أصلى..تفتكرى يكون بكام وممكن نلاقيه فين؟
كبّرت فى أذنيه الاثنتين..فقال لى هامساً :ـ
عارفة إيه اللى بيعجبنى فيكى يا حبيبتى؟
ماصدقتش ودانى وقلت :خير ..اللهم اجعله خير..قوللى فرحنى
ـ إن عندك قدرة رائعة على عملية الريسيكل..يعنى نسبة الفاقد فى البيت قليلة جدا..يعنى مثلاً العيش الفينو اللى بيفضل كل يوم بتحمصيه وتطحنيه وتعمليه بقسماط للبانيه ..بدل ما نشترى الكيس بتلاتة جنيه وخمسة وسبعين قرش يا حبيبتى..مش كده وبس..لأ دة عملية التحميص نفسها بتتم أثناء الفرن ما هو شغال للاستفادة القصوى من طاقة الغاز الطبيعى اللى كدة كدة بتبقى شغالة لأى هدف تانى

أمسكت وجهه بكفىّ وأنا أحاول إخراجه من الموود..فأطال النظر إلى وجهى وقال فى النهاية بعد زفرة عميقة:ـ
ـ إنت وشك دهنى على فكرة.. هو باعتبارك مهندسة كيميائية مافيش طريقة نقدر نستخلص الزيوت من الجسم الآدمى إن شالله نستخدمها للعربية يعنى..بالتقطير..صح؟
لطمت على وجهى كرد فعل بدائى وهمجى..فانتفض مذعوراً..وطمأنته أننى أحاول معرفة طبيعة بشرتى الدهنية تنفع وللا لأ لاستخلاص زيت العربية وذلك باللطم المباشر

فقال بعد أن لمحت الدمع فى عينيه :ـ
أنا صعبان عليا الغلابة والناس اللى دخلها قليل والناس اللى دخلها معدوم وكمان الناس اللى مش بتقدر تفكر كويس ازاى تدير حياتها
صمت قليلاً..ومد يديه برقة متناهية..وأخرج من تحت اللحاف ذلك الرسم البيانى


إنت عارفة إن الطوفان جاى جاى وهيغرق الكل..فاكرة تيتانيك..المسألة مسألة وقت..ناس كثيرة ماتوا فى الأدوار السفلية من المجتمع..وناس بتسرق علشان تفضل راسها فوق مستوى المياه..والباقى هم الأطول قامة..وساكنى الروف..يارب بس ينصلح الحال قبل مستوى المياه ما..انت بتعملى إيه؟

نظرت للمبرد الذى كنت أقلم به أظافرى واستعذت بالله من الشيطان.. وأزلت النظرة التى علقت على وجهى كرد فعل طبيعى لحديثه الرومانسيكى..المبرد مدبب وجميل..ولكن الملاءات مازالت بيضاء..والشراشف على رأى إخواننا الشوام لسة مغسولة.. وطقم الملايات بالشىء الفولانى ..وهتبقى زروطة بأة ودم كتير وكدة
وبعدين فى الآخر هو مالوش ذنب
الحكومة هى السبب
أحسْبن ؟

Labels: تأملات, شئون خاصة, مرأة

Posted by بثينــــــة :: 8:44 PM :: 21 Comments:

Post a Comment

---------------------------------------