I B R A H I M

الله يحفظك ويثبتك ..
حقيقة أنا أيضا مريت بهذي الفترة لكنها لم تدم طويلا .. ولله الحمد ..
كنت أفوت صلاتين الى ثلاثة في اليوم .. والحمد لله كانت قبل بلوغي الرشد ..

وجزا الله أم عبد العزيز خيراً ..

يابختها بالحسنات اللي جاتها

أحييك على صراحتك ..!

^_^

كتبت رد واختفى

عموما كنت اقول

الله يثبتك ويجزى اختك ام عبدالعزيز كل خير ،،، قل آمين يابراهيم

تصدق كنت مثلك ، كنت لا اصلي وفي كثر من الأحيان كنت اعاند من يناصحني خصوصا ان نصايح البعض الله يهديهم كانت اقرب للهواش. بعد وفاة الوالد الله يرحمه صليت لي ابو ثلاث ايام ثم تركتها فترة الين جات الوالدة الله يحفظها وضغطت الزر قالت لي ليش ماتصلي يوليدي؟ اذا مو لنفسك صل عشان ابوك ، ترا ذنبك في رقبتي ورقبته .. بعدها صرت اصلي عن قناعة خوفا على والدي .. ثم بعدها عرفت طعم الراحة النفسية من جد ،، حتى اني اذا تركت الصلاة ليوم او يومين تيجيني غلقة الله لا يوريك ، ومن عقبها وانا ولله الحمد مواضب على الصلاة ولي اكثر من 8 سنين

ومثل ما تفضلت يا ابراهيم ، الدعاة عندنا يبيلهم يغيرون اسلوبهم شوي و يبتعدون عن التكرار والتقليد ، والله ان البعض اذا جاء يخطب و يوعظ وهو شوي ويبكي انك اذا كنت تصلي يمكن تترك الصلاة بسببه ههههه

الله يثبتنا واياك وكل مسلم

تحياتي لصراحتك

الله يثبتك ان شالله
وجميل منك تعرض لنا هالتجربة
بالفعل النصيحه البسيطه والاسلوب الجميل هي الي تدخل القلب على طول وتآثر بالانسان
جزاه كل خير اختك على الشريط وجعلها في ميزان حسناتها
والله يصلح حال الجميع

اشكرك ابراهيم على تطرقك لمثل هذه المواضيع المهمه ولتي تعتبر للاسف منتشره بين شبابنا وبناتنا هذه الايام

كثير منا اصبح لا يأبى الا ليعيش ماهو كل جديد في الحياه ويعيش كل العيش بلحظاتها بعيدا عن الله سبحانه وتعالى ومن الملاحظ للجميع هو التهاون بترك الصلاه والتي من دونها لو يتفتح قلب الانسان ..

اكرر شكري لك ابراهيم على هذه المدونه

أحييك على صراحتك يا برهوم : ) الله يثبتك
واتفق معك ممكن يتغير الانسان من كلمة
الله يتوب علينا
شكرا على الموضوع المميز برهوم

هلا والله بخوي إبراهيم .. البوست مرة وجداني اليوم ..

بصراحة لكل واحد منا قصه مع الصلاة .. أنا اللي ” ضغط الزر ” عندي شخص غريب .. الشخص هذا مثال في عايلتنا للانحلال و الظلال و الفسق .. الرجال راعي بلاوي الله يستر عليه .. مرة كان جاي عندنا بالبيت و كان وقت صلاة المغرب .. المهم راح يوضئ .. و قال لي: شوف ياولدي الصلاة مثل الدين ممكن يتأجل بس ما يروح من عليك .. وقتها حسيت بصدق في كلامة .. و بنفس الوقت شلون هالإنسان مع كل البلاوي اللي يسويها .. بس الصلاة عنده شي ثاني ..

الحمد لله من بعدها الحال تغيير .. بس عندي لك سؤال ياليت لو تجاوب عليه: أبي أسمع رايك باللي يكون تاجر مخدرات أو مفحط و بعدين يبطل هالأمور و يصير يلقي محاضرات عن أسباب هدايته و من هالسواليف .. وفي بعض المخيمات .. بعد مايخلص ينصحهم شوي .. فجأة صاروا بعض الناس يبكون و يطلعون غراش خمر من جيوبهم و الشيخ الحالي ” المفحط السابق” يكسرها على المسرح !!! و أبي أعرف و يش الحدود برايك في نقطه ذكر التجارب السيئه ؟

شكرا لك ..

برهوم التوبة تغسل الحوبه ولاشك ان الله انعم عليك الان فالتعبد بالصلاة
هي من فضل الله على عبادة وبالمناسبه انا من اشد المعجبين بالدكتور
محمد العوضي اسلوبه متجدد وخطابه يدخل القلب وثقافته اكثر شئ تميزه
وعدم إغراقه في الجزئيات من محامدة
نشكرك على صراحتك وتنويرك لنا

و الحمدلله انك رجعت لطريق الصواب و جزى الله اختك الف خير

الحمدلله على الهداية

وهذي حلقة قذائف على اليوتيوب
http://www.youtube.com/watch?v=LvY9GMdu1m0

كلامك عن الاسلوب الدعوي جميل,
في فترة الصحوة عندنا في السعودية في التسعينات, ما زاد عدد المهتدين بشكل ملحوظ,
بينما بعد الالفين, لما صرنا نسمع للدعاة من خارج السعودية وشفنا اساليب جميلة محفزة كان الاثر كبير وعدد التائبين زادوا بشكل كبير جدا. فيه ناس كثير مو مقتنعين بهالكلام وان اشوفه حقيقة. صحيح عندنا علماء كثير لكن اصحاب الاسلوب قليل.

الله يثبتنا واياك على طاعته,
يسعد ايامك يابو خليل

الله يبارك فيك وفي صحتك وفي عقلك

جميل أن نعرف أخطاءنا ونتراجع عنها
جميل أن نعترف ونصارح أنفسنا قبل الغير

جميلة هي تدوينتك…
وجزاها الله خير ام عبدالعزيز

والله يهدينا ويهديك ويجعلنا من الرفقة الصالحه

بل أنا من أشكر يا إبراهيم ..
برغم أني ما قد تركت الصلاة في حياتي .. بس من جد وأنا أقرأ لك وأقرأ التعقيبات كنت أمسك دمع عيوني يا غالي ، حسيت إني بين أوادم وناس تعرف ربها .

اللهم اغفر لي ولإخوتي ..
اللهم اغفر لي ولإخوتي ..

ماشاءالله عليك ياابراهيم ..

طمنتني ، لأن عندنا واحد كذا ، الله يهديه ويصلحه .. على انه كان يحافظ على الصلاه وهو صغير ، بس دخل المراهقه -من سنه كذا- وهو مايصلي ،الا فيما ندر ..

الله يجزاها خير ام عبدالعزيز ..

السلام عليكم والله انا اول مره ادخل موقع اسلامي حياتي كلها مواقع عادية او غير عادي ..
قريت هذا الموضوع وحسيت ان الشخص هذا يوصفني كأني انا

انا مازلت الى الان تارك للصلاة يعني اصلي في الاسبوع يمكن صلاة واحده او ثنتين واحيانا يمر شهر بدون اي ركعة ..

ميحتاج اطيل عليكم انا الان اريد ان اصلي اريد ان احافظ على الصلاة مثل الشباب الي هنا كيييييف ارجوكم … انا تقصيري في الصلاة بسبب الكسل والنوم وبس مافي شي ثاني وعارف كل الاحاديث والوعيد الشديد لتاركي الصلاة بس احس مثل ماقال اخوي ان قلبي خلاص من المعاصي صار اسود ميأثر فيه شي … ابغا الحل تكفون والله تعبان نفسيا … احيانا احافظ على الصلاة لمدة فتره وبعدين حبه حبه اجد نفسي تركتها ولا اصلي الا يمكن يوم الجمعه هذا اذا صليتها …. تكفون عطوني حل قبل مايجيني ملك الموت
المشكلة انا متزوج وعندي ولد وبنت ابي عيالي اذا كبرو يشوفوني اصلي عشان اكون القدوه لهم بس مني عارف

استعن على الطاعة بطاعة الله
تصدق لأجل أن يعينك الله على شيطانك..
ألزم نفسك بالصلاة مهما كان انشغالك ومهما أخرتها فصلها
أن لاتؤديها بالمرة أسوأ بمراحل من تأخيرها وإن كانت الأخرى يعاقب عليها الإنسان ..
يا أخي الكريم
لا أدري ما أقول لكني حزنت لأني لا أعرف بماذا أساعدك
وسعدت لأنك تبحث عن حل
وستجده ..
“احفظ الله يحفظك”