Monday, March 31, 2008

صباح غريب يا بشر

تسللت رائحة كالورد إلى أنفها فهرشت أنفها هرشة سريعة..ورد ؟ إيه هيجيب الورد هنا
أرهفت سمعها من تحت اللحاف الخفيف ذى الزخارف الهندية.. موسيقى..يالهوى..موسيقى فى بيتى..حاشا وكلا
ربما كانت زقزقة الزخارف بتاعة اللحاف قد توافقت مع زقزقة حواف السرير الفيرفورجيه الذى يذكرها صوته فى كل لحظة نوم غابرة بملاهى سوق العيد بتاعة السبعينات
ولكن لا ..إنه عمر خيرت..يا للهول
انتفض اللحاف وانطلق صوت آخر صارخاً فى نفس الوقت فقد كادت الصينية تسقط من يدى زوجها

جوزى انا شايل صينية أكل..هى الدنيا جرى فيها إيه
ـ الفطار يا حبيبتى
تقف منكوشة على السرير وقد اسبهلت أساريرها
ـ مين حبيبتك؟ إنت جبت واحدة فى بيتى؟ هى حصلت ؟
ـ انتِ يا روح قلبى..تعالى اهدى بس.. أكيد اتخضيتى
ـ المنبه ما ضربش..الولاد ماراحوش المدرسة؟ دول عندهم امتحانات..الساعة كام؟
ـ اهدى اهدى.. ممكن..بصى يا ستى..الولاد راحوا المدرسة..لبستهم وفطرتهم وعملت سندوتشات وبصيت عليهم لغاية ما الباص أخدهم..أنا وأنت اللى أجازة النهاردة
ـ ليه ؟رفدونا ؟ وللا الثورة قامت ؟
ـ الثورة قامت يا حبيبتى امبارح بالليل
ـ آه ..طمنتنى ..افتكرت رفدونا
ـ ممكن تفوقى شوية بأة..ثورة الحب هى اللى قامت..وحسيت إنى مقصر فى حقك فقلت نعمل عصافير النهاردة..نروح سينما.. نتسكع زى أيام زمان..نروح النادى نتشمس
مدت إيديها ولمست جبينه..مش سخن ولا حاجة
ـ والأخ عمر خيرت إيه جابه عندنا بدرى كدة؟
ـ دول يا حبيبتى الموسيقى والورد والوجه الحسن
ـ بس أنا حاسة الدنيا ضلمة لسه بره..هى الساعة كام؟
ـ كفاية نورك عليا..نور لى روحى وقلبى
ـ انت جميل أوى النهاردة ..خليك كدة على طول..عايزة أعمل
pause
فى اللحظة دى
ـ أقوللك كمان خبر هيطيرك من الفرح..عارفة امبارح بالليل حصل إيه وأنت نايمة ؟
ومال بنفسه على ودنها الشمال ووشوشها
وتفنجلت عيناها واشرأب عنقها وهزت رأسها غير مصدقة .. وصرخت بأعلى صوت:ـ
ـ لأاااااااا .. مستحيل
ـ صدقينى.. والتليفزيون مشغل مارشات عسكرية وقرآن من ساعتها..والدنيا مقلوبة
ـ ما هو أنا ممكن أصدق الورد..أصدق عمر خيرت..أصدق إننا رجعنا عصافير.. أصدق إنى روح قلبك..لكن تقوللى إن دة حصل.. أهو دة اللى مش ممكن ابداً

وحانت منها التفاتة إلى المنبه فوجدته يشير بعقربيه إلى الثالثة فجراً..فنظرت إليه جزراً وشذراً ..وهمت بأن تهجم عليه كـ طائرة حربية فى طلعة جوية
ولكنه تفاداها و ضحك حتى بانت نواجذه..وقال:ـ

Gut u
it's April fools day

nyahahahaha

Posted by بثينــــــة :: 3:12 PM :: 32 Comments:

Post a Comment

---------------------------------------