The Caller : من قلب مايو

اليومين دول عندى حالة هدوء نفسى...عارفة اسكت دماغى ومسمعش شىء.

مايو دايماً كان شهر التغيير...دايما كل جديدى يحصل فى بداية الصيف وفى قلب مايو تتبدل الظروف والحكايات وتبدأ مراحل وتخلص قصص...تتقشر معانى وتبان قيم واحيانا تنحط!

بس الجميل انى قدرت اليومين اللى فاتوا اقضى اوقات هادية على البحر من غير وجع قلب جديد ولا ذكرى قلب قديم...انا والسما والبحر...حاسة كل شىء ومتذوقاه... حاسة الهوا بيسلم عليا والشمس مصاحبانى والزرع بيهدينى من عطره صبح ومسا...مبسوطة بكل ده وحاسة حرية وانطلاق ومبسوطة بانبساط ولادى بنفس الحرية والانطلاق...

مايو جميل...لا صيف ولا شتا...جو جميل وهدوء اجمل...المصيفيين لسة مهجموش على شواطىء الساحل...فالساحل كان ليا لوحدى...

يمكن محدش حيحس بيا الا واحدة محجبة محاطة بميت تحفظ...تلاقى جمال ربنا خلقه وحرية جميلة تداعب خُصلاتها بلا عيون وبالتالى منتهى الانطلاق والاستمتاع ...

الأفكار مش بتبطل اطلالاتها الدايمة عليا...وكانها نسيج ضيق المسام ملفوف بعناية حول ذهنى لا يتوقف عن غزل الأفكار...بس فيه فرق بين افكار فى نفس هادية وأفكار مضطربة ونفس تحاول الا تتحطم وعشان كده افكارى متناسقة اكتر...

كان نفسى اقضى وقت اكتر فى المكان ده...كان نفسى مرجعش...بس طبعاً مينفعش.

حاسة كيان شركتى ابتدا يتضح...حاسانى مش يائسة...واعترافاتى لنفسى مؤخراً فادتنى جداً جداً.

زمان ...فى دكتور احترمه جدا نصحنى ان قبل اى قرار كبير او مرحلة صعبة احسن شىء الواحد يسافر وبعدين يقرر...الأمور بتتضح أكتر...

د/ طارق...انا آسفة انى كنت ناسية...

انت عندك حق.