Sunday, July 06, 2008

تناقضات حياتية

حوار سمعته أمام السينما الصيفي التي لم أدخلها لشدة الزحام

احجز لنا في أي فيلم علشان خاطري .. حسن ومرقص ماشي
مش هادخل فيلم لعادل إمام .. ما بقيتش أحبه يا ستي
ماطول عمرك بتحبه .. ودخلتنا التجربة الدانماركية .. ما هو لو كان فيه نيكول كنا دخلنا
دة راجل بيحشر الكلام عن الإسلام في كل فيلم وبطريقة كوميدية وبيتريق علي الحجاب .. والمسلم في أفلامه متخلف أو إرهابي .. وآخرتها بيعك في أمور طائفية .. لأ يعني لأ .. هاحاول احجز في فيلم دوللي .. قصدي نمس بوند
ماشي يا .. حاج

‏*‏***

حوار سمعته أمام ماكينة الصراف الآلي .. اسمها كدة بالعربي

يا أخي الفلوس دي بجناحات .. الواحد مش بيلحق يقبض يلاقيها طارت
أدينا مستنيين قبض شهر سبعة ولو أنها محسوبة مقدما
البركة في الأسعار .. اللي زادت تلاتين مرة علي حس الزفت العلاوة ‏.. ربنا يكون في عون الغلابة
علي رأيك .. تتصور ان فيه ناس بتقبض معاش أقل من مائة جنيه .. أنا باشوفهم بعيني في مكتب البوستة

سيدة عجوزة جدا تهمس : حاجة لله يا بني
الله يعطيك يا ست

‏*‏***

حوار بين اتنين صحابي .. الاتنين فوق التسعين كيلو من أكتر من عشر سنين

إية دة خسيتي جامد يا بنتي بتعملي إيه
انت كمان نزلتي خالص بقيتي تحفة .. أنا باشرب كباية مية سخنة علي الريق .. وأنت
أنا باخد أعشاب .. وسكر دايت
إية دة .. يعني مش هتاكلي من التورتة اللي أنا عاملاها بإيدي .. دي خفيفة خالص .. بالمكسرات
ودة معقول أكسفك .. طيب حتة صغيرة .. لأ .. مش صغيرة أوي كدة

‏*‏***

حوار لم أسمعه ولكنه حكي لي بالحرف .. حوار بين زوجين لم يمر علي زواجهما عام

أنا مش قادرة أكمل معاك .. لازم نسيب بعض
قوليلي سبب واحد
انت طيب أوي .. هو دة السبب
هي الطيبة عيب اليومين دول .. أنت شايفاني ساذج أو أهبل
لأ طبعا .. بس الطيبة دي زهقتني .. انت لية مش بتتخابث معايا
أنا بحبك يا مجنونة
وأنا كمان .. بس الحب والطبطبة مش كل حاجة
أنا قصرت في حاجة
لأ .. أنت مثالي .. ومثاليتك دي زهقتني .. احنا لازم نبعد شوية
هو احنا مخطوبين
لأ .. بس طيبتك وحنيتك وكرمك زهقوني في العيشة كلها

الطلاق سيتم قريبا
‏!‏!!!

Labels: تأملات

Posted by بثينــــــة :: 2:33 AM :: 13 Comments:

Post a Comment

---------------------------------------