بـلال فـضـل.. واحـد مـن الـناس.. اللي بحبهم

بـلال فـضل


بلال فضل .. واحد من الناس .. واحد من الناس اللى بحبهم رغم اختلافى مع بعض اراؤه وانتقادي لبعض افلامه اللى اتهرت انتقاد طبعا من نقاد ليهم مآرب- حلوة مآرب دي؟- ومصالح وتظبيطات ، ومن جمهور بعضه متحفظ ، والبعض الاخر بيتفرج على فيلم عشان يضحك ويسمع له كلمتين حلوين ويتكل على الله



انا عرفت بلال فضل ازاي؟ اول مرة اخد بالي من اسم بلال فضل كان على افيش فيلم حرامية فى كي جي تو اللى دخلته سينما اكتر من مرة والفيلم كان عاجبني جدا وحبيت اعرف مين اللى كتبه وكانت اول مرة اقرا اسم بلال فضل بس قلت ده تلاقيه واحد مغمور وجت معاه - باي لاك خاصة ان فيه سيناريستس كتير صغيرين بيكتبوا افلام اقل ما يقال عنها انها تنفع مسلسلات اذاعية عبيطة ، بعدها بفترة عرفت من واحد صاحبي انه كان صحفى فى الدستور وانه كان سكرتير تحرير الدستور وهو عنده اتنين وعشرين سنة تقريبا - الاصدار الاول - ولما توقفت الدستور- بدوافع حرية الرأي وعدم قصف الاقلام طبعا- مبقاش يقراله الا بالصدفه مقاله هنا ومقاله هناك على حسب التساهيل ، برضه مخدتش بالي حتى لما شفت اسمه بعد كده على افيشات الافلام اللى بعضها معجبنيش كمشاهد عادي والسبب مش الهيافة ولا السطحية ولا التفاهة اللى فى الافلام دى لانى احيانا مكنتش بشوفها هايفة ولاني بعتبر التفاهة والهيافة نوع من الثقافة الغير مدرجة والغير معترف بيها ودى مش مبالغة ، مش كل التفاهة شيء سلبي لانها اولا جزء من الواقع ولانها ثانيا بتفرق من رأي لاخر وملهاش تعريف محدد..مش موضوعنا .. - باستثناء فيلم ابو العربي لانه كان زي النكتة البايخه بس متصورة بطريقة مبتذلة وساذجة غير ان هاني رمزي ممثل ضعيف في رأيي وكبيره يبقى سنيد وملوش دور يحسب له الا دوره في مسرحية ماما امريكا مع الاستاذ صبحي ، ولو له دور في السينما يحسب له ايضا فهيبقى دوره القوي في فيلم همام فى امستردام لما وطى يجيب الفلوس اللي وقعت من هنيدي وحطها في جيبه ومشي .. كان فيه فيلم لبلال بطله كان حكيم.. مفكرتش اتجنن فى عقلي وادخل الفيلم اصلا لان حكيم ده بيجيبلى العصبي وعشان كده حتى مش فاكر اسم الفيلم ده .. حد اهبل يدخل فيلم لحكيم؟ بتهيالى برضه ان الفيلم ده منجحش كايرادات . مش متاكد بس معتقدش انه نجح


عايز اقول حاجة مهمة.. اكبر غلط ممكن حد يرتكبه انه يدافع عن حد بيحبه لمجرد انه بيحبه وميعترفش بغلطه لما يغلط ويفهم ويقدر انه غلط .. ممكن يكون بلال عنده تقييم لنفسه عن اعماله بينه وبين نفسه.. اكتر حاجة تهمني فى الموضوع اني كنت مستحرم موهبة واحد زي بلال فى شغل تجاري بحت يستمر فيه فترة طويلة وبتهيألي ان بلال نفسه ميقدرش ينكر ده وعارف ان ذكاء بلال وحسن تقديره لنفسه هيجبره فى فتره انه يتوقف ويهدى على نفسه عشان يحس انه قدم صورة كاملة لموهبته فى حدود المتاح برضه لان مش كل ما يستطيع بلال كتابته يستطيع تنفيذه او تستطيع بعض العقليات الانتاجية للجزارين - سواء اللي كانوا بتوع لحمة وملهمش فى الانتاج او جزارين السوق الفني - ان تجازف لتنفذه .. اتمنى انه يوم ما يقدر ينتج فيلم - ويستحمل لو خسر - يقدم فيلم واحد بس تقدر ايمي - بنت بلال- تفخر بيه ويبقى لبلال عمل الناس تدعي له عليه ، بتهيالي ده مش هيحصل قريب خصوصا فى سوق منيل بنيلة زي اللي احنا شايفين انتاجه ده





قرأت لبلال فضل في الاعداد الاولى من الدستور الاصدار الثاني ، عملت سيرش على اسمه على النت لاقيته متظبط بصراحة .. اللي بيشتم واللي بينتقد واللي رادد عليه يقوله النوبيين جزء من مصر وحاجات ملهاش دعوة ببعض الا انها في معظمها تحمل اتهاما لبلال بانه جزء او احد العوامل السلبيه فى تغييب المجتمع!!! يخربيوتكوا .. تغييب المجتمع مرة واحدة؟ قلت رائع والله يبقى بلال ده جامد طالما بيغيب المجتمع اللي هو مش موجود اصلا.. المهم .. بعد فترة قليلة من القراءة لبلال مكنتش عارف ان ليه مجموعة قصصية اسمها بني بجم الا لما لاقيتها بالصدفة فى مكتبة دار الشروق اللي فى كارفور اسكندرية وقلت بس .. هات يا معلم المجموعة دي وشوف بقى من بلال اللى بيتنطط على خلق الله ده ومغيب المجتمع- عجباني اوي تغييب المجتمع دي- ، اشتريتها وكنت داخل سينما بعدها بشوية اتفرج على فيلم ريد آي


روحنا مطعم ناكل ففتحت الرواية وقعدت اقرا اول كام صفحة لاقيت مقتطفات او بعض عبارات بلال مختارها، منها كلمة الاستاذ أكرم القصاص ( من يأكل كبدة النصر لا يحلم بالنصر ) طبعا النصر ده بتاع الكبدة اللي بتجيب التهاب كبدي وبائي فى رمسيس بتلاتين قرش والشعب بياكل ولا بيهمه ، وجملة تانية للمذيع المستجنيص المرح اللي خفة دمه كفيله بان تجعل مواسير الصرف الصحي تنفجر الفنان اللى ليه فى التمثيل والغنا وتقديم البرامج ولبس البدل ذات الالوان الربيعية المنتعشة والراقص اللولبي سمير صبري .. سكر حلوة الدنيا سكر

بدأت اقرا فى اول قصة .. مقدرتش اشيل عيني وارد على صاحبي وهو بيكلمني - قلة ذوق انا عارف - من كتر اندماجي مع اسلوبه الثري والممتع .. دخلت السينما وانا بقول يارب الفليم ده يخلص عشان اقرا الرواية وفعلا لم استمتع بالفيلم يومها وفى الاستراحة قعدت اقرا فى القصة وطبعا صاحبي كان جاب جاز مني وهو قاعد يكلمني وانا اقوله ااه اممم ايوه لغاية ما جاب اخره واتنرفز هههههههه وانا لو مكانه كنت قطعتها ، انا برغي كتير صح؟ براحتي .. المهم خرجنا من السينما وانا في التاكسي من كارفور لميامي قعدت قضيتها قراءة فى القصة واجمل حاجة بقى انك تقرا عن الاسكندرية وانت فيها ، بصراحة كنت مستبد للغاية ومستحملتش ان تامر - صاحبي اللي جاب اخره - ياخد يقراها وقلت له ما تخليك معايا يا عم هو انا بكلم نفسي !!؟ هههههههه ما احلى الاستفزاز .. شيء ممتع للغاية ، على فكرة يومها تامر زعل بجد لاني زودتها بجد .. المهم قررت انى افضل صاحي اقراها ومنامش .. وفعلا فضلت اقرا فيها ليلة كاملة حتى صباح تاني يوم ونمت وانا بقراها .. انا بحكي كل ده لسبب ، انا قليل جدا لما اتعلق بفكر وعقلية حد وتعجبني رؤيته وصراحته احيانا وبجاحته احيانا اخرى .. دى تركيبة بلال فضل فى رايي .. يمكن الايام دى انا مقلق من بلال بسبب موقفه فى الدستور بس معتقدش انه هكرهه ومعتقدش انى مش هعذره بالطبع لاني بعزه ولاني برضه فاهم كويس جدا طبيعة العلاقات المتداخله والظروف اللى احيانا تجبر الواحد على الصمت او السلبية من مواقف كلامه فيها هيحسب عليه اولا واخيرا لكن ميساندش حد في ظلم شباب وضياع حقهم .. برضه تااااني مش موضوعنا . الرغي ده شيء رائع حقا.. لما خلصت قراءة بني بجم قضيت وقت طويل اقرا لبلال على المنتدى الخاص بيه واقرا فى صمت كعادتي عندما اعجب بشخص ، قرات له كتير واستفدت منه فعلا وبحبه فعلا

بحب بلال فضل لانه بيقول كتير اللى انا عايز اقوله ، وبحبه لانه بيقول اللي هو عايز يقوله ، وبحبه لانه زي ما قال عن نفسه جزء من حالة تناقض عام انا بشاركه فيها تماما، بحبه لانه طلع السلم بعد تعب ومشقة وعمارة هاهاهاها .. بحبه لانه بيقول اللى احيانا بتردد انى اقوله وبينقل اللى بشوفه وقليل اوي ممكن يتخيلوا ان ده موجود فعلا او بيهربوا منه لاسباب عبيطة اهمها انهم مش عايزين يشوفوا الصور الكخة الياياي فى مجتمعنا البريء الطاهر المسالم اللي مفيهوش امراض اجتماعية قاضية عليه

بحب بلال فضل لانه منصف في كثير من الاحيان .. ربما كانت له مواقف تحترم كثيرا خاصة موقفه من الاخوان الذي اجله مراعاة لدور عمرو عبد السميع القوي فى حالة حوار واقرانه عبد الله كمال وحمدي رزق- مع ان بتهيالى بلال بيحترمه مش عارف ليه بس هو حر وذنبه على جنبه- وشوية ناس كتير اغلبهم انصاف صحفيين والتهمة الغير مأولة والغير قابله للتشكيك او اخضاعها لنظرية المؤامرة اللاظوغلية هي انهم مخبرين امن دولة في هيئة صحفيين ، موقف روزا اليوسف والصحفي وليد الطوغان أيضا الذي انقلب على احد اصحاب الفضل عليه - بلال- وشن على بلال هجوم بلاش نقول غير اخلاقي لانها كلمة عبيطة لكن خلينا نقول هجوم ساذج بالظبط طرفين متخانقين فيجي طرف فيهم يصدر واحد عبيط عايز يظهر فى الصورة وياخد صفحة كاملة يتكتب عليها اسمه - في جريدة نسبة توزيعها بالظبط زي توزيع صناديق القمامة فى محافظة القاهرة توزيع اقل من ضعيف- وانا يومها دمي اتحرق بصراحة ودخلت على منتدى بلال - مكنش عندي مدونة وقتها اكتب فيها اللي انا عايزه- وكتبت مشاركة يبدو انها لفتت انتباه زوجته الكريمة فردت على كلامي وكانت اول مرة تدخل المنتدى باسم بلال وكتبت.. ليس دفاعا عن بلال فضل ولكن- اييييييه انا بحكيلكم تاريخ يا ردالة هههههه ، حاسس انى قاعد ادام احمد منصور في شاهد على العصر .. المهم فعلا كان دمي محروق لكن بعد فترة من تثبيت البرواز المطالب بمحاسبة بلال اخلاقيا حسيت ان روزا اليوسف بغباء رئيس تحريرها ورئيسه توجوا بلال كواحد من الشرفاء اللي بتمسح بيهم بلاط الصحافة ذات المرتجع الاعلى والتوزيع الادنى

يحسب لبلال موقفه من الاخوان .. يحسب لبلال صدقه واحترامه لذاته وثراء خبرته رغم صغر سنه

طبعا بلال ليه اخطاء ومواقف مش بتعجبني ومش بقتنع بتفسيره وتحليله ليها ، بس مش هكتبها دلوقتي على الاقل لاني لما بكتب عن حبي لشخص بفصل العاطفة عن العقل لو قدرت والحقيقة انا مش بقدر اعمل ده للاسف احيانا كتير بلتمس الاعذار وبحط نفسي مكان اى حد بنتقده واحيانا بستنى اسمع كلام مباشر ولو مقتنعتش بقول رايي ... اكيد هكتب عن انتقاداتي له فى وقتها بلا حرج وبدون ان انفي او ابرر له خطأ وخاصة ان موقفه الاخير من ابراهيم عيسى فى الدستور اللي بشوفه موقف مايع ومعجبنيش للاسف .. عموما ميمنعش انى اكتب عن اى حاجة متعجبنيش فى بلال لانى فعلا بتصيبني حالة من القرف لو حسيت ان فيه انسان بحبه وبحترمه ومع الوقت وتكرار الغلطات - خاصة الامور اللى تتعلق بحقوق ناس مفروض يقف جنبهم ويكون معاهم مش عليهم- يفقد حب واحترام محبيه

_________________

واحد من الناس

واخيرا.. بحبه لانه كتب فيلم واحد من الناس .. واحد من اقوى واهم الافلام اللى كتير انصفوا فيها بلال واللي انا شايف انه فيلم يستحق بجداره انه يكون فخر لبلال ونقطة مهمة فى كتابته وفى تحويل اتجاه البوصله الانتاجية لنوع من الافلام الصادقة .. مش لازم بلال يفضل يقدم ده بس لازم يفرض بذكاؤه المعهود رؤية جديدة على الكتابة السينمائية .. ده مجرد رأي مشاهد عادي .. لكن بشوف اني متابع جيد الى حد ما


بعد ما شوفت واحد من الناس محتاج اقرا كتير لجبرييل جارسيا ماركيز الاديب العبقري رغم ان القراءة لماركيز انسب في فصل الشتا لانه فصل الخمول والكآبة وده هيتواءم مع كتابات ماركيز

عجبتني جدا اغنية لؤي .. انا مقتنع بصوت لؤي وهيثم شاكر جدا وشايف انهم فعلا عندهم موهبة حقيقية ، يمكن انا سمعت صوت لؤي لايف وبدون مؤثرات صوتية فى حفلة خاصة وعشان كده مقتنع بخامة صوته القوية المليانة شجن .. مناسب جدا صوت لؤي واختياره لاغنية الفيلم

كريم عبد العزيز ممثل قوي ، ربما اقنعني بالاكشن اكتر من احمد السقا مع اني بحب الاتنين بس بشوف السقا مبالغ شوية .. كتير من النقاد والمشاهدين كتبوا عن كريم ومعنديش جديد اقوله بصراحة غير انه ممثل جامد غير مدلل سينمائيا رغم انه ابن المخرج محمد عبد العزيز وعمه عمر عبد العزيز .. اجتهاده يستحق التقدير

منة شلبي .. بص بقى عشان تبقى عارف .. بصراحة انا مبطيقش منه شلبي خاصة فى المسلسلات ، معرفش مين اللي اسند لها دورها في واحد من الناس لكن الحقيقة انها ابدعت بمعنى الكلمة ، دور جديد كان هيبقى بايخ لو منى زكي مثلا قامت بيه .. منة يليق على ملامحها انها واحدة من الناس ..يمكن كمان حشرجة صوتها!؟ يمكن

محمود الجندي .. محسيتوش فى دور الاب اوي .. بس لما نيجي نفكر مين هيعمل دور الاب؟ انسى حسن حسني ده خالص لانه كان هينتقص من قيمة الفيلم لانه مرطرط ومش بعيد افتح الحنفية الاقيه نازللي منها .. الراجل ده ممثل جامد بس بيشتغل سينما ومسلسلات بالكيلو ، لطفي لبيب؟ مبحسوش قوي .. ينفع في دور حاخام يهودي مثلا فى مسلسل عن المنظمة الصهيونية العالمية ، ينفع في دور المشعوذ فى يا انا يا خالتي ، طب جمال اسماعيل؟ يمكن فيلم مافيا حرقه فى دور الاب مع انه عمله اكتر من مرة.. بتهيالي بلال فضل كان الود وده يجيب عبلة كامل تعمل دور الاب هههههههه ، المهم برضه محمود الجندي مكنش دوره جامد

الظابط.. مفيش حد الا واثنى عليه .. فعلا كان لايق عليه الدور وعبقري اللى اختاره بعيد عن مجدي كامل مثلا او اي ممثل جته او الراجل اللي دايما يعمل دور ظابط شرطة فى التمثيليات الحمضانه بتاعة قطاع الانتاج

عزت ابو عوف.. عادي .. لا جديد

فيه واحد بقى نفسي اشكره بجد.. يمكن لان مجال شغلي فى الدعاية والاعلان بيخلوني اهتم اوي بالتصميمات.. المبدع اللي عمل كلمة واحد من الناس بالطريقة دي وتصميم البوستر قوي جدا ومتميز وفي رايي انه اجمد من تصميم يعقوبيان بكتير ... ابقوا شوفوا الراجل ده بازازة حاجة ساقعة يا جماعة لانه مبدع بجد وبروفيشنال بمعنى الكلمة

احمد جلال.. ياريت كان فيلمك نزل قبل يعقوبيان .. كانت هتفرق كتير

بلال فضل .. استاذ صحافة وهتبقى استاذ سينما قريب او مش قريب بس اكيد هتكون ان شاء الله

بعد ما كتبت على ركن المصريين عن واحد من اهم الناس اللي ليهم فضل عليه في حياتى الدكتور يوسف القرضاوي ، كتبت هنا عن بلال فضل .. وان شاء الله هفضل اكتب عن كل اصحاب الفضل عليه لغاية ما اموت ، متمنيا عليهم ان يتمسكوا بالحق والحرية والابداع وده اهم ما سيتركه اى انسان بعد موته ..وايضا رصيده الاهم فى الحياة

بلال فضل .. واحد من الناس اللى بعترف لهم بالفضل