أسرار التصوير الرقمي 1
أسرار التصوير الرقمي 2
فوتوشوب للمصورين
فوضى الأسعار … مرة أخرى !
لن أتكلم في الموضوع عن مشكلة ارتفاع الأسعار مرة أخرى , فالموضوع أستهلك وأصبح حديثاً عابراً تنقله أفواه الأطفال الآن , ولن أتحدث عن المسببات وأن ارتفاع البترول سبب رئيسي , فالوزير السابق حلها بكلمتين : غيروا عاداتكم الغذائية 
, وكأن المسألة وقفت على المواد الغذائية بس !
راح الوزير وجانا وزير , والحال مازالت تسير , من أسوأ لأسوأ , حماية المستهلك عبارة رنانة تتشدق بها الغرف التجارية وقبلها وزارة التجارة , ولكن أين الحماية ! . والتجار يلعبون في الأسعار لعب !
فقبل ايام أقرأ أن التجار في السعودية يمهدون لإرتفاع أسعار المواد التموينية خلال شهر شعبان بنسبة 30-40 % , على أي أساس ترتفع الأسعار !؟ وسعر البترول ينخفض والدولار يرتفع ! … 
بس …. عرفت السبب , درسنا في الإبتدائية ترتيب الأشهر الهجرية أن بعد شهر شعبان يأتي رمضان , وهو موسم الجشع لدى التجار ! , إلى هالدرجة وصل الإستهتار بالمواطن أن يهدد التجار والوزارة نايمة ؟ ! 
وين مؤشر الأسعار ؟! أو تسكيتة وخلاص ! , ليش ماتعمم الفكرة ؟ … وليش ماتحدد الوزارة نسبة الإرتفاع حسب مؤشر التضخم لدينا ! , ليش المسألة ضايعة ! وتصفي بالأخير بيد البائع والتاجر اللي يلعب بالمواطن لعب !
بقول لكم مواقف ولا أظن فيه أحد منكم إلا وصار له من هالنوع :
بالعادة أخذ حليب الأطفال لبنيتي لجين بسعر من 19-21 ريال حسب الصيدلية أو البقالة , لكن الآن ومع الدعم اللي جاي من الحكومة المخصص لحليب الأطفال ارتفع سعره إلى 25 ريال والمشكلة اني ألاقيه بسعر أقل حتى 23 ريال ! , ما ادري وين راح الدعم !! 
الموقف الثاني دخلت إحدى الصيدليات الطبية لشراء شامبو دوف , وعند دفع المبلغ شاهدت الصيدلي يمرر العلبة على جهاز الباركود ليسمعني صوت الجهاز , لفت انتباهي أن الشاشة بجهة الصيدلي وبعدها قال السعر 18 ريال 
, انا استغربت من السعر خابره قبل كم يوم بـ14 ريال , قال لي :الأسعار هابه في السماء أنت ماتعرفش ! , قلت في نفسي وهي واقفة على الشامبو , دفعت المبلغ وطلعت لمحل السوبر ماركت القريب من الصيدلية لأخذ بعض الأغراض , إلا وأشوف الشامبو نفسه وأرفع العلبة إلا والسعر 14 ريال !
استغربت صراحة , أخذت اغراضي وطلعت لصيدلية ثانية والسعر نفسه 14 ريال ! … ياذا اليوم اللي ماراح يعدي على خير ! , ماقضينا من ارتفاع الأدوية إلا وبدينا باستغلال عدم وجود السعر على بعض الأصناف ! , طبعاً رجعت الشامبو للصيدلي وأنا أقول في نفسي , ما ألومك لو لعبت في الأسعار , وهو فيه أحد بيحاسبك ؟! .
وقبل فترة طلب أحد الزملاء سندوتش بيض من البوفيه إلا ويتفاجأ بأن السعر صار ريالين !! , أنا بدري ليش ارتفع السعر ! الطبق بـ 14 ريال وفيه 30 بيضة ! مازاد شي كثير , يعني على أي أساس ترفع السعر ! , أرجع وأقول وهو فيه أحد بيحاسبه !؟
وربنا يحاسب المفتري !
|
التصنيف: سواليفي| 337 القراءات| | |
3 أغسطس 2008 في الساعة 12:54 ص |
من أمن العقوبة أساء الأدب !
قالوها طاش [ الوزارة مكبره الوساده ! ]
ومـا غير ربك يعين !
3 أغسطس 2008 في الساعة 5:43 ص |
وماكدونالدز رفعو اسعارهم بعد
المضحك فعلاً قصه الصيدلي
ولكن صيدلي ممكن مافي رقابه عليهم وتقريباً العمليه الحسابيه تعتمد على شخص واحد وممكن يكون نفسه الصيدلي هو المحاسب
ولكن المصيبه إذا جت من سوبرماركت كبيره مثل جيان وكارفور وهيبربنده
حصلت لي ومع اقاربي مواقف كثيره معهم (^_^)
السعر المعروض مختلف تماما عن السعر المحسوب في الأجهزه والظاهر ع الفاتوره خصوصاً الأجهزة الإلكترونية.
3 أغسطس 2008 في الساعة 9:40 ص |
أذكر الوالد قبل شهر حصل له موقف مع راعي محل يبي يبيع له خيشة الرز أم 20 كيلو ب 200 ريال وقعد يقول له إنه من المستحيل إنك تلقى خيشة الرز أم 45 كيلو الحين بأقل من 500 وإذا لقيت تعال لمي أشتريه منك ..!!
بس أشوى إنه ما لعب عليه و شرى منه ،،
ولو كنت مكانه كان رحت لم ها النصاب هذا وعلمته كيف أسعار المستشفيات مرتفعه هذي الأيام
3 أغسطس 2008 في الساعة 9:45 ص |
حماية المستهلك نايمة بالعسل
وتجار جشعون يسعون الى مضاعفة ارصدتهم البنكية على حساب الفقراء والمساكين لم يجدو من يردعهم
شكر الله لك
3 أغسطس 2008 في الساعة 12:47 م |
النتيجة ستقود الى تضخم مالي .. والى نكسة اقتصادية
طيب ع الاقل تصير فيه موازنة بين الغلاء والرواتب .. المادية صارت سمة المجتمع وين القيم الاسلامية وين ووين .. ياحيف بس على وطني!
3 أغسطس 2008 في الساعة 1:41 م |
خالد بن محمد :
والمصيبة لو جيت تكمل معاملة لك وإلا شي ..
نطوا لك من كل مكان يبون الرسوم
3 أغسطس 2008 في الساعة 1:42 م |
miss-sara :
وهي وقفت على ماكدونالد …
أما مصيبة اختلاف السعر ! هذي يبيلها تدوينة كاملة وبالصور إن شاء الله
3 أغسطس 2008 في الساعة 1:44 م |
ماجد :
ياكثره سالفة ترى ماراح تلقى عند محل ثاني …
بيني وبينك حنا السبب بطيبتنا الزايدة علطول نصدقهم …
شف أي بضاعة يقول لك ماراح تلقاه وعندي لك البديل فهذا دليل أنه أكبر نصاب وحرامي
3 أغسطس 2008 في الساعة 1:45 م |
أبو علي بن علي :
خوفي أن المجتمع راح يتحول لطبقتين غنية وفقيرة !
الوسط راااااااااحت
3 أغسطس 2008 في الساعة 1:47 م |
Ghada :
التضخم جانا وتوطانا ومازال أعوانه الآن يحركونه …
أي وطنية تتكلمين عنها , والمتسمي بأنه وطني أول من باع الوطن والقيم والمبادئ من أجل حفنة دراهم …
3 أغسطس 2008 في الساعة 1:56 م |
بدر ترا كلامك صحيح سعر الشامبوا لما قالك 18 ريال
وشفته باماكن ثانية 14 ريال
تصدق زوجة خالي توها الاسبوع اللى راح كنى مجتمعين وكانت تتكلم عن الحليب الاطفال ان من الصيدلية لما يجيبة خالي زياده السعر 3 ريالات او 4 ريالات عن السعر الاصلي
ولما تجيبة من البقالة تحصل ان نفس السعر الطبيعي ، وقالت حق خالي وقال لها لا يتخيلك …
كلامك صحيح الاسعار تختلف من مكان لين مكان …
بس شوف الشامبو يختلف سعرة من الصيدلية عن البقالة ( بالهلله ) يعني يمكن 95 هلله بالكثير ..
لاني مرة اشتريت شامبو من جيان وانا دائما اخذة من الصيدلية بـ 12 حصلتة بجيان بـ 11 ونص بس كان انه مايرغي بالشعر المنتج فية شئ ..
والله لعب بكل شئ
الله يرحمنى برحمته ماندري وش نهايتها
4 أغسطس 2008 في الساعة 12:54 ص |
على طاري اللعب بالأسعار
كثيير تصير فيني.. و أنا يا غافلين لكم الله
ادفع و امشي و لا اجيك لا الفاتورة و لا السعر.. لما استوعبت مصروووفي وين قاعد يروح و انا ماكو التزامات ولاشي.. فقمت انشب ابلعووم اي احد اشتري منه.. مطعم .. سوبر ماركت.. و استفسر عن السعر و اقول مو كان سعره كذا!! صرت مثل الاجانب الي يحسبون الفلس فلس.. بس صج لأن اكثر من مرة يطلبون مبلغ معين و ما اكون شاريه الا شوي و لما اجيك معاهم..يقولي: “سوري مااام.. اتس جست ثري كي دي..” و يكون قايلي4.750-مثلا-
موضوع ساخن .. خليتنا انفضفض.. وشكلي بنزل تدوينه عاللعب بالأسعار و ليس غلائها..
شكرا اخ بدر.. و تقبل مروري
4 أغسطس 2008 في الساعة 1:49 ص |
مضيعة بيتهم :
ليتها واقفة على نص ريال أو ريال …
لكن التفاوت الكبير واللعب بالأسعار
هنا المشكلة والمصيبة
4 أغسطس 2008 في الساعة 1:53 ص |
غـيـر :
هنا مشكلة فينا يالخليجيين , ندفع وبس
مدري ليش الواحد يستحي يستفسر من السعر …
وأنا ملاحظ في المحلات الكبيرة يغيرون في السعر عن المعروض على الرف , لكن وين اللي يسأل أو يستغرب ؟!
يدفع ويمشي !
4 أغسطس 2008 في الساعة 1:53 ص |
غـيـر :
هنا مشكلة فينا يالخليجيين , ندفع وبس
مدري ليش الواحد يستحي يستفسر من السعر …
وأنا ملاحظ في المحلات الكبيرة يغيرون في السعر عن المعروض على الرف , لكن وين اللي يسأل أو يستغرب ؟!
يدفع ويمشي !
تشرفنا بحضورك
4 أغسطس 2008 في الساعة 2:08 م |
زيادة ريالات بسيطة..قد تغتفر..
لكن أن تكون الزيادة بالألاف ودون مبرر واضح وصحيح فهه الطامة الكبرى..
تخيل قريب لي مستأجر وحدة بـ 14 ألف..
بعد سنة يوم جاء يجدد العقد وإذا بصاحب العقار يقول بأن سعر الوحد أصبح بـ18 ألف..
والسبب ارتفاع أسعار المواد..
وربنا ع المفتري..
4 أغسطس 2008 في الساعة 2:58 م |
عـــمـــر :
أما سالفة رفع آجارات البيوت عذي تدوينة لحالها …
والله شي يقهر وخصوصاً إذا كان البيت قديم ومب جديد , ولو رفع بنسبة قليلة مقبولة , لكن يرفع باالآلاف … مصيبة .
أحد زملائي اتصل عليه صاحب محل العقار وأخبره برفع أجار المحلات اللي مستأجرها لنشاطه التجاري أكثر من 10 آلاف ريال دفعة واحدة ؟!!
وزميلي الثاني ارتفع سعر آجار بيته 3 آلاف ريال دفعة واحدة , والمشكلة أنه ساكن بالبيت له أكثر من 10 سنوات .
4 أغسطس 2008 في الساعة 3:09 م |
شي يرفع الضغط ,,
ووزارتنا الكريمة رافعة ايديها كأن ماعندها حل للمشكلة ..
11 أغسطس 2008 في الساعة 6:20 ص |
والله وجبتها ع الجرح
وغير البوسترات الي يوزعونها بنده وغيرها من خوياتها
يحطون السعر ولما اجي احاسب القى الدبل يابن الناس وين العرض
يقول مافيه عرض