Friday, August 29, 2008

هات هات .. بلاش هات .. طيب خد البتاع صلحه

الأول
-----
هو : بالنسبة لحاجات رمضان .. اعملي المنيو بتاعتك وهاتيها وأنا هاختار .. ما تنسيش تلبسي زي الويترس هه
الجمهور : وووو
تيتة 'بتشوف نغابيش وتسمع طراطيش وبتتكلم تحابيش' : حبني والبس لك زعبوط .. قاله هي المحبة بالنبوت
هي .. كتبت له القائمة علي ظهر الشيت الأخير للزيارة المباركة لكارفور والذي صار اسمه الكفار -اسم اطلقه 'هوالصغير' منذ سنوات ولاقي استحسانا من دافع الشيت الذي يبلغ طوله متر ونصف علي أقل تقدير - تقصد الشيت طبعا
توابل
عندك فلفل اسود وابيض وكمون وزعتر وروزماري وبردقوش .. اطحنيهم وبلاش كسل
هي : ربنا ما يقطع لنا عادة .. لازم يبقوا طازة علشان الشمخة
ووقفت وقفة شامخة
الجمهور : ووووو
هو : أنا راجل صحيح بس صاحي ومدقدق .. لما هتطحنيهم هيبقوا طازة .. كانسل
سمنة وزيت و إية إية
ليه كل الكميات مضاعفة .. ليه مش طبيعي وعادي .. لماذا تقولون مالا تفعلون
هي : ستندمون
هو : كانسل
مكسرات
بأمارة إيه .. مش بنشوف منك لا كنافة ولا قطايف ورامية الهلب علي سي قويدر
هي : ستحزنون
هو : كانسل
فوانيس
بتهرجوا والله العظيم .. دة أنا بافكر أعمل فرشة علي الرصيف وأبيع التمنتاشر فانوس اللي جوة
هو الصغير : لا .. السنة دي فيه فانوس توك توك والسواق هو اللي بيغني
هي الصغيرة : بيغني طحنوه
الجمهور : هههههه
هو الكبير طبق الشيت الطويل بعناية فائقة .. وأكله زي اسماعيل يس في فيلم جزر
لحقوه بكباية مياه .. شرق لما شافها معدنية
هو الصغير : تعملوا إية لو كسب كل واحد فينا مليون جنيه .. أنا هاجيب بيتش باجي .. وفانوس توك توك
هي الصغيرة : هاجيب روبوت يعمل بدالي الهوم وورك في رمضان علشان أشوف السبعتاشر مسلسل
هي الكبيرة : ممكن نروح بيهم عند الكفار ييجي سبعين مرة
هو الكبير : أنا بأة هاشتري عماد متعب واسقعه وأبيعه علي رمضان الجاي
الجمهور : هههههه

Labels: رمضانيات, طراطيش كلام

Posted by بثينــــــة :: 8:00 AM :: 11 Comments:

Post a Comment

---------------------------------------