Saturday, August 30, 2008

قول للزمان ارجع يا زمااان

التاني
-----
هو الكبير : تعرفي إن مصر أكتر بلد الواحد يحس فيها برمضان
هي الكبيرة : دة علي أساس إننا لفينا العالم في رمضانات قبل كدة .. دة احنا آخرنا جمصة
الجمهور : جمصة جمصة ووو
هو الكبير : باتكلم بجد .. فيه عندنا طقوس متعودين عليها بتخلي إحساسنا برمضان أعلي
هو الصغير : زي يحيي الفخراني كدة يعني
الجمهور : هههههه
تيتة 'وهي بترسم علي الزجاج ' : قال علي رأي المثل .. اللي تزور بيه الفخراني هات بيه قلل
هي الصغيرة : يا تيتة الفخراني دة ممثل مش بتاع قلل .. وأنت بأة هتفضل طول عمرك شنتوف .. بابا قصده الحاجات المصرية الأصيلة .. زي الزبادي البلدي مثلا
الجمهور : هاهاهاها
هو الصغير : بس ما تقوليش شنتوف .. أنا عارف كل حاجة .. بابا قصده المزة
هي الكبيرة مذهولة : أنهي مزة يا حبيبي .. اللي في أي دور
الجمهور : هاهاهاهاها
هو الكبير : ولد
هو الصغير : الموزة اللي بتعمليها في عزومات رمضان الكبيرة يا ماما اللي بتبقي محمرة في الفرن
هي الكبيرة بنظرة حادة مسنونة ل هو الكبير : آآآه قلتلي
تيتة 'تمصمص شفايفها' : اللي مايستعنانيش ورد علي راسه .. ما استعناهوش جزمة في رجلي
هي الصغيرة : يا تيتة انتي بتهدي النفوس وللا إية .. خلينا في رمضان والخشاف اللي مش بنحبه .. وقمر الدين اللي بنشربه بالعافية .. كلها حاجات مصرية أصيلة .. صح يا بابا
هو الكبير 'ساهما' : لأ طبعا .. أنا قصدي حفلة استطلاع هلال رمضان و
هي الصغيرة : ماتفهمنيش غلط بس مش هي دي اللي عمرنا ما سمعناها لأنكم بتقولوا الخطبة دي بتاعة سنة ألف وتسعمية ماعندهمش غيرها
الجمهور : ههههه
هو الكبير : أنا قصدي تجمعنا في انتظار الهلال .. وفرحتنا ببداية الشهر
هي الكبيرة ل هي الصغيرة : سيبيلي أنا المداخلة دي
ما تفهمنيش غلط بس ما احنا كل سنة بنقول إنه قرار سياسي وإننا بنمشي ورا البلاد التانية وإن الوحدة العربية مظهرها الزاعق الآن هو إن الهلال بيظهر في الكويت والجزائر في نفس ذات الوقت .. ومش عايزة بأة أجيب سيرة الأخ العقيد وعمايله .. يا عباياته
الجمهور : يييييي
هو الكبير'مغمضا عينيه ومسنودا علي خدديات الكنبة وكأنه مش سامع' : وكمان مدفع رمضان ودعاء النقشبندي
هي الكبيرة : ما تفهمنيش غلط بس احنا مش بنسمع الجامع من بيتنا وبطلنا نشغل الراديو زي أهالينا ساعة الفطار من ساعة ما شالوا النقشبندي وجابوا عمرو دياب وبنجيب كارتون للولاد ساعة الفطار
الجمهور : جرجير جرجير
هو الكبير 'حالما' : والتمر ساعة الفطار وصلاتنا المغرب جماعة
هي الكبيرة : ما تفهمنيش غلط بس احنا بنبقي ياعازمين يا معزومين ومش بنلحق نعمل كدة
هو الكبير' متذكرا' : وموائد الرحمن اللي في بلدنا بس ومش في حتة تانية .. تكافل اجتماعي عندنا احنا بس
هي الكبيرة : ما تفهمنيش غلط بس احنا بنقول ساعات انها هنا بس علشان هنا الغلابة كتير .. وبنقول ساعات إنها بتاعة الرقاصات .. وبنقول دايما إنها دعاية وحبشتكانات
الجمهور : هيييييه
هو الكبير' مازال مغمضا عينيه ومسنودا علي خدديات الكنبة' : وصلاة التراويح في الجامع وقراءة القرآن
هي الكبيرة : ما تفهمنيش غلط بس احنا بنبدأ قراءة القرآن في البيت وفي الجامع بعد الصلاة وبعدين نكمل في أوقات العمل الرسمية و بنروح نصلي يومين وبعدين نأنتخ في البيت نشوف يحيي الفخراني
هو الكبير 'فاق أخيرا' : الفخراني .. الفخراني .. سكتوا الولد الشنتوف دة بيغلوش عليا وأنا بافتكر رمضان بتاعنا .. بتاع زمان .. هو يعني إية شنتوف
الجمهور : وووووو

Labels: رمضانيات, طراطيش كلام

Posted by بثينــــــة :: 3:00 PM :: 13 Comments:

Post a Comment

---------------------------------------