Sunday, August 31, 2008

أنت تنفض .. إذن أنت دبور

التالت
-----
اتفقوا علي تنظيف البيت معا .. بعد ما خليت بيهم الست أم تتح
‏*‏**
هي الصغيرة : بحبك أوي يا ماما .. أوي
هي الكبيرة 'بصة من فوق النضارة' : هاتي من الآخر
هي الصغيرة : فيه أم كدة .. علي فكرة إنتي خسيتي خالص
هي الكبيرة : ودة بيؤكد إنك عايزة حاجة
تيتة 'وهي تهز رأسها' : ابن بطني يفهم رطني
هي الصغيرة : مش عايزة أعمل البلكونة أنا .. والناس تشوفني بانفض .. شكلي بيبقي عبيط كدة
هي الكبيرة : هي دي الحقيقة
هو الصغير : إنها عبيطة هاهاها
هي الصغيرة : لا طبعا هي قصدها البلكونة .. صح يا ماما
هي الكبيرة : ياريت طيب توضبي أوضتك وأوضتي
هو الصغير 'يقرأ في قصة‎‏'‏ : وكانت سندريللا بنت حلوة و .. عبيطة
الجمهور : ههههه
هي الكبيرة : وإنت لم كل الباسكتات في أكياس وحط كل الأكياس في كيس وطلعه برة
هو الصغير : أنا كنت حاسس إنك مرات بابا
الجمهور : هههههه
تيتة 'وهي بتسشور شعرها' : يا ابني .. نضف بيتك ورشه .. ما تعرف مين يخشه
هو الكبير : خلصت تلميع التليفونات والتليفزيونات والكمبيوتر .. عايز شاي بنعناع بأة .. بنوتتي الحلوة هتعمله
هي الصغيرة : كنت حاسة إنك جوز ماما
الجمهور : ههههه
هي الكبيرة : حبيبي عايزين نبدل أماكن السفرة والأنترية مع بعض .. تغيير علشان رمضان والعزومات
هو الصغير 'يقرأ في نفس القصة' : وكان سندريل راجل غلبان وشقيان وعايز شاي بنعناع
الجمهور : هههههه
هو الكبير : يا ولاد مافيش مشكلة لما حد يشتغل شوية في البيت .. لازم نساعد بعض ..إحنا كأننا كلنا نحل بيكافح في خلية واحدة علشان نوصل للعسل
هي الصغيرة : ماما بأة هي ملكة النحل .. عارف بتعمل إية في دبورها بعد ما بتخلف هاهاها
هي الكبيرة : هس خالص .. ياللا يا ولد .. الباسكتات
هو الصغير لم كل الأكياس في كيس .. كان حاسس إنه دبور صغير والفيلم المعجزة مأثر علي خياله .. طلع علي السلم .. ووقف جنب الأسانسير
هو الصغير 'بعلو صوته' : يا ناس يا لوكال يا شعبيين .. فككوا من الزبالين التانيين .. وكم بيبي كم كم
الجمهور : هاهاهاها

Labels: رمضانيات, طراطيش كلام

Posted by بثينــــــة :: 3:00 PM :: 7 Comments:

Post a Comment

---------------------------------------