وبدأت المعركة
اذا سألت شخص سواء بالكويت او في جزر الواق واق من هو حرامي الناقلات بالكويت او من هو صاحب اكبر سرقة بتاريخ الكويت ؟ سيجيب فورا .. علي الخليفة ، سواء كان متهم ولا صج حرامي بس راح يقول الخليفة .. وبما ان محمد الصقر من النواب اللي فضحوا الخليفة امام الشعب من خلال ادلة ومن خلال وقفاته في مجلس الامة ومن خلال ندواته العديدة فكان رد صحيفة الوطن بما انها الذراع الاعلامي الوحيد (تلفزيون الوطن انضم اليها حاليا) فلم يجد الخليفة سواء هو او (خليفته) ابنه صاحب الباند والشعر الطويل سوى تركيز جهودهم على الصقر
لست في دفاع مستميت عن الصقر و آل الصقر كيفهم عندهم لسان اهمه يدافعون فيه عن أنفسهم بس ان يصل الموضوع الى الضحك على ذقون القراء هذا امر غريب جدا
شوفوا شنو حاطين اليوم في صفحة مخصصة وبالالوان عن النائب محمد الصقر
الموضوع بسيط جدا وسأحلله حسبما جاء بالوطن .. الصقر غرّز الفجر في سيارته عند الشاليهات !!
الحين نحلل الموضوع شوي .. سيارة الصقر ولا سايق الصقر ؟ انزين الصقر كان يسوق ولا ماكان يسوق ؟ انزين السايق والصقر كانوا مع بعض ولا بس واحد منهم ؟ أوكي تذكرون رئيس مجلس الامة الخرافي لما رجع وشاف ان السايق مخالف وتم تصوير دفتر السيارة وتم نشر الصور في الصحف ؟ هل الخرافي اللي كان يسوق ؟ يا اخوان السايق مو رسول والخرافي مو رسول عادي الواحد يخطأ
بس الاعلام والصحافة يبون شي يخلي الناس اللي ماعندها سالفة يصير عندها سالفة من خلال اخبار حصرية او اخبار أكشن حتى وان كانت ملفقة او ملعوب فيها
المهم نرجع حق موضوعنا الاساسي
من ضمن الصور المنشورة صورة بطل ويسكي وكرتون أيضا .. طبعا بدون تلميح الا ان سبب التغريزة ان الصقر كان سكران .. الله اعلم سكران ولا مو سكران .. بس وين جرأة الوطن وجرأة الخليفة انهم يقولون سكران ؟ ماعندهم ادلة ؟
الصقر لما قال الخليفة حرامي قالها باعلى صوت وسمّع سكّان المريخ وعنده ادلة .. بس لما تطلع الوطن وتلمح ان الصقر سكران ولهذا السبب غرّز فهو امر مشكوك فيه صراحة
وبعدين الصقر ترك سيارته ودفتر سيارته علشان المصور يصور !! انزين هذا سؤال ثاني ورد في ذهني … في شخص من عمليات الداخلية اللي استنجد فيهم الصقر مو امين على شغله ولازم يحاسب كونه اعطى دفتر السيارة لمصور ما !! والله اعلم من هو المصور يمكن نفس الشخص من العمليات باع الصور للوطن مقابل مبلغ من المال… الله اعلم
شوفوا الصور المنشورة وشوفوا المصور الفنان وتعليق الصور
سيارة من الخلف !! وأنا شكو بالسيارة من الخلف ؟
سيارة من الداخل … يالطيب شنو بتسوي اعلان على المرسيدس ؟
وأخيرا بطل الويسكي والكرتون
منو فيكم راح البر ولا الشاليهات ؟
ومنو فيكم راح كبّر وفيلكا والجزر الكويتية الاخرى
بطول الويسكي تارسة الديرة
وأسد حولي والجهراء وعبادان كل يوم طالعين بالهجرايد صايدين مليون طن مخدرات واللي يدش اصلا مليار طن .. وبعدين شبهات كثيرة تدور حول الكمية اللي صايدينها … وين تروح ؟ هم الله اعلم
الحرب بينهم كانت باردة بس أعتقد راح تكون حامية خلال الايام القادمة
تحديث
الصقر يرفع دعوى قضائية بسبب ماتم نشره اليوم في صحيفة (الوثن) .. الايام ستثبت من هو على حق والقضاء سيأخذ مجراه
Bo Jaij Says:
سخافة ما بعدها سخافة
هل يحتاج نائب عنده حصانة و ما أبى أقول تاجر كبير و عنده واسطات و إمكانات أن (يهرّب) كرتون ويسكى رخيص (الريد ليبل أرخص ويسكى على الإطلاق) بدبة السيارة و ينحاش عندما غرزت السيارة فيه؟؟؟؟
كم سيارة أصلا إمسجله بإسمه من خلال شركاته…و كم سائق يملك و كم سكرتير عنده فى شركاته و بعمله كنائب بمجلس الأمة و كرئيس البرلمان العربى؟؟؟
مثل ما إتفضلت ..هل رئيس مجلس الأمة الخرافى مستهتر بقوانين المرور و لازم إنشهر فيه لأن سائقه الخاص صفط بمكان مخالف بالمطار؟؟
هل قراء جريدة الوطن بهذه السذاجة حتى توضع كل هذه الصور لسيارة المرسيدس و كأنه كتالوج عرض….و صورة كرتون إمعفن و زجاجة مكسورة نراها بكل شوارع الكويت و براحاتها بنهاية الإسبوع…حتى ننسى كل مشاكل البلد و مصائبه و نقعد (إنكت) على النائب الصقر مثل بو قتادة و دندرمه
شوية ذمة و مسؤولية يا جريدة الحكومة
Posted on October 4th, 2008 at 1:22 pm
________________________________________________________________
Mansour Says:
خواء فكري و أدبي لا أكثر
Posted on October 4th, 2008 at 3:05 pm
________________________________________________________________
lfc-q8 Says:
ok tell me who in kuwait dosent know thar al sager drink …. its well known.. nothing new but the way it was in the paper was in a bad way o 3aiiiiiib
Posted on October 4th, 2008 at 3:34 pm
________________________________________________________________
zatoichi Says:
اصلا هذي الجريدة امقتها وتركت قراءتها من فترة ولله الحمد والمنه
وبعد خبرك هذا ونشر الصور والتلفيق بالهمز واللمز صارت اسوأ من اخبار موقع العربية
الحين فرانكوم يقدر الصقر يرفع عليهم تشويه سمعه بدليل صور الويسكي والكرتون بما انه الخبر يتكلم عنه ولا مايقدر بما انهم اكتفوا بوضع صور بدون تعليق منهم
Posted on October 4th, 2008 at 4:09 pm
________________________________________________________________
Labeeb Says:
أنا بس بفرض ومجرد افتراض لا أكثر ولا أقل إن كلام الوطن صح وأن الصقر كان مكثر شرب و غرزت فيه السيارة. انزين مو أضعف الإيمان الستر على الرجال وعلى سمعة عايلته وأهله وعياله، شلون يفضحونه؟
يعني مو بس كذابين إلا ما كو حيا ولا أخلاق ولا دين
مع العلم أني ما أحب الصقر ولا من أتباع المنبر
Posted on October 4th, 2008 at 4:24 pm
________________________________________________________________
EXzombie Says:
فخار يكسر بعضه
Posted on October 4th, 2008 at 4:41 pm
________________________________________________________________
Shaima'a Says:
صراحة الضحكة و الشعر مع الباند خطيييييرة :) اقول شنو سالفته اهو مع أحمد الفهد هابين بتطول الشعر صج وين لجنة الظواهر السلبية عن هالموضه الجدبدة !!!
اما على سالفة الصقر فخلهم نارهم تاكل حطبهم و مو شي جديد على جريدة ولد حرامي الناقلات انه يتصيد اي شي على ناس اكبر منه مقاما مثل الصقر و السعدون و ماراح يقدر يسوي شي لأنه يدري انهم على حق و كل اللي بالديرة يعرفون التاريخ العظيم للخليفة
بس شتقول هالجريدة لا ذمه و لا ضمير
Posted on October 4th, 2008 at 4:55 pm
________________________________________________________________
هلا باللي يراضيني Says:
“ذهب لطريق ترابي لأسباب غير مفهمومة”
! الله أكبر! الله أكبر
Posted on October 4th, 2008 at 5:18 pm
________________________________________________________________
Blog 3amty Says:
http://blog3amty.blogspot.com/2008/10/blog-post_04.html
شكرا على الموضوع :)
Posted on October 4th, 2008 at 10:18 pm
________________________________________________________________
Frankom Says:
:)الشكر موصول لك على التعميم
Posted on October 4th, 2008 at 10:44 pm
________________________________________________________________
fashionista Says:
تحليلك رائع
Posted on October 4th, 2008 at 11:38 pm
________________________________________________________________
ABDULLAH Says:
http://www.alwatan.com.kw/ArticleView/tabid/57/Default.aspx?article_id=451292
شوفو الرد الحقير من الوطن
مجرد افتراض
نقول ان الصقر كان سكران او كان بالشاليه يشرب ويسكي حلو
قولو حلو
الكرتون شطلعه للسياره
وشطلع الكرتون من السياره
انزين يعني الحين الوطن تبي تقنعنا ان الصقر راح يشتري كرتون من البياعين الي ما ادري وين يبوعون
اقل شي اذا يبي يشرب يدز اي واحد من الي يشتغلون عنده ويجيبه للشاليه
ولو ان معاه كرتون يطلعه للشرطي الي جا يساعده
او حتى يمكن داق على 777
=========================
هالحركات من الجرايد تدل على الاستخفاف بعقول القراء
يعني كأنهم يقولون القراء اغبياء خلونا نكتب لهم اي شي
ترا بيصدقونا على طول ويضحكون كاتب الموضوع ومحرر الجريده وسكرتيره
:)
Posted on October 5th, 2008 at 1:31 am
________________________________________________________________
الخيلاء Says:
ينوا و قعدوا
يهال كل واحد يدور الزله على الثاني
عيب عليهم هذيل يتكلمون بلسان الشعب
المفروض يرتقون بصحافتنا
حرام كل شي كان يضرب فيه المثل
خربوا و شوهوه
حسبي الله عليهم
Posted on October 5th, 2008 at 1:57 am
________________________________________________________________
JiBLaCiTY Says:
حط حيلهم بينهم يا رب
في دعاء نادرا ما اسمعه يتردد
ماذكره بالظبط لكن اكتب مااتذكره
” اللهم اضرب الكافرين بالكافرين واخرج المسلمين منهم سالمين”
وانا اقول
” اللهم اضرب اللي مايخافون الله باللي مايخافون الله واخرجنا منهم سالمين”
آمين
Posted on October 5th, 2008 at 6:46 am
________________________________________________________________
kazmawy Says:
..اثنيناتهم مااردى من المربوط الا المفتلت
وشدعوة الصقر مسكت الحين..الله لا يبلينا ويحط حيلهم بينهم
Posted on October 5th, 2008 at 10:23 am
________________________________________________________________
يعقوب Says:
Labeeb,
اش دخّل الصقر بالمنبر؟؟
فرانكوم، الوطن جريدة وضيعة مالكها و مديريها و كتابها حثالات المجتمع..كيف تستغرب تصرفاتهم؟
Posted on October 5th, 2008 at 6:50 pm
________________________________________________________________
عصل سحيك Says:
جريدة الوطن استغرف من قراءها صراحه
اعلانات وعفسه ونوع ورقها ووالوانها موحلوه
بالنهاية الجرايد كلها نفس العناوين والاخبار الا شي موجود بالوطن مو موجود بغيرها الي اهو فؤاد الهاشم وبس
Posted on October 22nd, 2008 at 8:39 pm
________________________________________________________________