أفراح الاصدقاء.. فلنفرح إذن

يمكن انا فرحان بيهم جدا وكان نفسي من زمان اكتب عنهم بس كنت خايف لا قدر الله تحصل اي مشكلة ابقى فولت على العيال من اولها ...عمر ورانيا... اتنين من زملائي في الشركة اللي كنت بشتغل فيها من سنتين او اكتر ، يمكن لاني من بدايات قصتهم كنت سبب فيها نوعا ما ويمكن لاني بعزهم جدا لاحترامهم لذاتهم ولاهلهم ولانهم كانوا على قدر كبير من الشجاعة

فيه حاجات بتسعد الواحد رغم حزنه ، لكن احيانا قوة السعادة بتطغى على الحزن واحيانا العكس

من شهر بالظبط كانت خطوبة د تامر واحد من اصحابي المقربين

بعد يومين فرح أختي الصغيرة .. لو كتبت عنها هيتحول الكلام من مشاعر فياضة بالحب لاختي الصغيرة اللي بعتبرها بنتي وبعتبرها أمي ايضا الى كآبة نظرا لاني اضعف من تحمل فراقها لينا

، وبعد اسبوع تقريبا خطوبة اتنين من الناس اللي فعلا كانت ليهم قصة حب قوية جدا ومختلفة جدا جدا خاصة في احترامهم لاخلاقيات معينة قليل اوي لما نلاقي حد بيحافظ عليها .. عمر ورانيا اتخطبوا بعد فترة مش قليلة من الشغل مع بعض في شركة كبيرة .. الاتنين شبه بعض في حاجات كتير .. الهدوء والأدب والثقافة والالتزام ده غير تميزهم في شغلهم وابداعهم مع بعض لما يعملوا تصميم واحد وتظهر لمستهم الخاصة فيه

عمر كان بيكلمني امبارح على الموبايل وقال لي الخبر .. انا فرحت جدا جدا ومع اني كنت في مود زي الزفت لكن فعلا الخبر ده غير مودي تماما وخصوصا ان عمر قال لي اني اول واحد يعرف الخبر ده ، فرحت من قلبي لاني من زمان وانا بقوله يبقى حرام وظلم لو استسلمت للظروف ومتقدمتش تخطبها .. يمكن انا اعرف عمر قبل رانيا لكن اول يوم شفت رانيا في المكتب قلت لعمر البنت دي شبهك جدا ، وكنت بقولها كده بس هي كانت بتتذاكى عليه بدهاء البنات المعروف وتقولي ازاي؟ مكنتش بريحها طبعا .. النهاردة عمر اتقدم واتقبل طبعا الحمد لله

بعد تليفون عمر باقل من ربع ساعة لاقيت تليفون من رانيا .. رانيا كانت فعلا مش مصدقه وبالطبع وكالعادة قلت لها .. يا بختك بيه خسارة فيكي

عمر ورانيا بخبرهم السعيد ده قدروا يغيروا حالتي المزاجيه وفرحت فعلا اني كنت سبب ولو بسيط في ان اتنين يتخطبوا على ايدي وان كنت عارف انهم هيدعولي النهاردة وهيدعوا عليه بكره لما يتجوزوا ويخلفوا ويبقى عندهم اولاد وبنات يدوشوهم

مبروك يا حاج عمر .. مبروك يا بشمهندسه رانيا

بعد اسبوعين فرح هشام واحد من اصحابي اللي متوقعتش انه ممكن تطلع في دماغه ويتجوز بالسرعة دي خصوصا انه خاطب من خمس شهور بس .. هشام واحد من الناس العباقرة بمعنى الكلمة .. ممكن ياخد اكتر من كورس ويذاكرهم ويقعد على النت يعمل سيرش على ابحاث غريبة ويخرج ويتكلم في التليفون بالساعات وينام .. كل ده في اربعة وعشرين ساعة ومعرفش ازاي .. هشام برضه من اكتر الناس اللى اتعلمت منهم حاجة مهمة رغم سلبيتها أحيانا وقسوتها احيانا اخرى .. الصمت .. هشام في وقت الازمات والمشاكل بيفضل الصمت وانا بحكم صداقتي ليه من فترة مش قليلة اتعلمت ان الصمت أقصر الطرق للفهم والحل البديل للانفجار .. مبروك يا اتش

مراسلكم من المساجد والنوادي وقاعات الأفراح